ASSIT Air Greenland SAR-imik ingerlatsisussatut toqqagaaqqittoq

Nunatsinni ujaasisarnermut annaassiniartarnermullu isumaginninnissaq, Illersornissamut qullersaqarfiup upernaaq EU-mi sullissisussarsiuuppaa, tamatumalu kingorna Air Greenland isumaqatigiissuteqarfigineqartoq, timmisartuutileqatigiiffimmit nalunaarutigineqarpoq.

Isumaqatigiissut sapaatip akunnerani matumani atsioqatigiissutigineqarpoq, taamaalillunilu Nunatsinni ujaasisoqalersillugu aamma annaassiniartoqalersillugu Air Greenlandip qulimiguuliutai S-61-it 2017-ip tungaanut taama suliassinneqartassallutik, isumaqatigiissutillu ukiumik ataatsimik sivitsorneqarsinnaanera periarfissaasoq oqaatigineqarluni.

Nutaamik taama isumaqatigiissuteqartoqarnerata kinguneranik Air Greenland S-61-imik nutaaliaanerusumik, pingaartumik ujaasisarnernut annaassiniartarnernullu atorneqartartussamik pisivoq.

Qulimiguulik pisiarineqartoq Irlandimi sinerissamik nakkutilliisunit atorneqarsimavoq taamalu ujaasisarnernut annaassiniartarnernullu atortulersugaalluni, immikkut orsussamaataasiveqarluni, silatimigut kivitsissuteqarluni nutaaliaalluinnartumillu nammineerluni sammivissiorsinnaalluni.

Qulimiguulik taamaalilluni ujaasisarnernut annaassiniartarnernullu pitsaanerusumik atortulersugaalluni. S-61 pigineqalersoq 2016-ip aallartinnerani piareerneqassasoq Air Greenlandimit ilisimatitsissutigineqarpoq.