Air Greenland sallersatut inissisimanerminik atornerluinngilaq
Nunatsinni timmisartornermi sallersatut inissisimanermik atornerluinerunngilaq Air Greenland 2001-imi bilitsit akiinik bilitsillu atuuttarfiinik allannguimmat. Tamanna Østre Landsretimit aalajangersarneqarpoq – taamalu Nunatta Eqqartuussiviata aalajangiinera atortussanngortinneqarluni.
Nunatsinni Unammilleqatigiinnermut Ataatsimiititaliap 2001-imi aalajangiukkaluarpaa, aaqqissuussinermi nutaami akit qaffasippallaartut – tamannalu timmisartortitseqatigiiffiup nunatsinni sallersatut inissisimaneranik atornerluinerusoq.
Namminersornerullutik Oqartussat – Air Greenlandimi piginneqataasut – Unammilleqatigiinnermut Ataatsimiititaliap aalajangiinera tapersersorpaat – kisianni Air Greenland taamanikkut tamatumunnga akerliuvoq. Timmisartortitseqatigiit Unammilleqatigiinnermut Ataatsimiititaliap misissuinera kukkunernik ulikkaartutut isigaat kukkusumillu inerniliisimanerarlugu – taamaattumik Nunatta Eqqartuussivianut aalajangigassanngortippaat.
Nunatta Eqqartuussiviani aalajangiineq Air Greenlandimut iluaqutaasumik inerneqarpoq – Unammilleqatigiinnermut Ataatsimiititaliap eqqartuussivimmut uppernarsarsinnaanngimmagu akit sallersatut inissisimanermik atornerluinerusut.
Taama aalajangiineq Namminersornerullutik Oqartussat Østre Landsretimut ingerlateqqippaat – kisiannili tassa tamanna iluaqutaanngilaq. Ajoqusiiginnarpoq. Tassami Østre Landsretimi aalajangiunneqarpoq Air Greenlandip eqqartuussinermut atatillugu aningaasartuutai Unammilleqatigiinnermut Ataatsimiititaliap aamma Namminersornerullutik Oqartussat akilissagaat – tassa maanna Air Greenlandip 300.000 koruuninik checkimik tunineqarnissani naatsorsuutigisinnaanngorpaa.
