Air Greenland orsussap akiata qaffannissaannut piareersimavoq
Radioaviisimiit timmisartuutileqatigiit Air Greenland paasiniaaffigaarput, taakku aamma usiminnik oqilisaaniarnersut:
Air Greenlandimi aningaasatigut inissisimalluarnini iluaqutigalugu aamma orsussamik siumut piareersimasuuteqarnermigut Europami timmisartuutileqatigiit iliornerattut taamatut sipaarniuteqarnianngilaq. Soorunami uagut aamma sipaaarutissanik pilersaaruteqarpugut, tassanilu atortutigut sipaarutaasinnaasut assigiingnitsorpassuit misissorsimavagut, soorlu siumut eqqarsaatigereerlugu Kalaallit Nunaata orsussatigut isumaqatigiissutaa 2009-p kingorna naappat, taava malunniutit allarluinnaat maannakkut Europami misigineqartoq qaquguugaluarnersoq sunniutilerumaartussat piareersimaffiginiarlugit sillimavugut, Chistian Keldsen Air Greenlandimi tuniniaanermut ussassaarinermullu pisortaq nassuiaavoq.
Air Greenlandip siunissami sipaaruteqarnissami timmisartunik pisiffigineqarsinnaasut isumaqatigiissuteqarfiginiarpai, ilaatigut timmisartut manna nutaanngeqisut aserfallatsaaliinermut aningaasartuutit sipaarniarlugit nutaanik taarsernissaat eqqarsaateqarfigalugit Chistian Keldsenio oqaluttuaraa.
Aamma oqarpoq ukiuni tulliuttuni sipaarniuteqassallutik aamma pilersaarutaasumik ukiuni tallimani tulliuttuni
millioninik arlalinnik sipaarniuteqarniarput.
Aamma oqaatigaa, nunatsinni timmisartut usiinik annikillisaanissaq siunertarinngikkitsik, nunanimi allani timmisartut nunatsinni taama atugaatiginngimmata, Christian Keldsen oqaluttuarpoq.
Sipaarniarnermi sulisunik soraarsitsinermik timmisartunillu atorunnaarsitsinermik kinguneqarnavianngitsoq Air Greenland neriorsuivoq.
