Air Greenland immikkoortitsisoq
Kiffartuussinermi isumaqatigiissummi aningaasartuutit taamaattut ilaanngillat, kisianni Naalakkersuisut nutaamik isumaqatigiissiorumappata piareersimavugut, Air Greenlandimiit oqarput.
Vienne Nielsenip angutaa Nuummiit Attuliarluni Aasiannut januaarip ulluisa 25-anni pivoq, aatsaallu februaarip ulluisa sisamaani angerlamut apuulluni.
Naatsorsuutigeriinngisaminik sapaatip akunnerani ataatsimi Aasiaanniinnermini aningaasartuutit 1.500 koruunit taxarnerinnarmut atortariaqarsimavai. Kinguneranik nerisaqarnermut, najugaqarnermut angalanermullu aningaasartuutini matussuserniarlugit taarsiiffigeqqulluni saaffiginnissutaa Air Greenlandimut itigartinneqarpoq.
Nunatsinni najugaqartuusugut ikittunnguungatta ikioqatigiinnerusariaqartugut Vienne Nielsen isumaqarpoq. Taassuma nunaqarfimmiunut sullissinerup illoqarfimmiunut sullissinermit ajornerunera akueriuminaatsippaa.
Air Greenlandimit oqaatigineqarpoq Attumut angallassineq silarlummik, teknikkikkut ajutoornermik taartarneranillu peqquteqartumik kinguaattooqasimasoq.
Air Greenland A/S-ip nittaarsaassinermut pisortaa Christian Keldsen Radioaviisimut oqarpoq, nunaqarfinni timmisartuussinermi kiffartuussinermut isumaqatigiissummi, unnuinermi kinguartoornermilu aningaasartuutit ilaatinneqanngitsut.
- Soorunami aningaasartornarnerussaaq, taamaammallu kiffartuussinermut isumaqatigiissusiornermi missingersuutit allaanerusussaallutik. Christian Keldsen oqarpoq.
- Allaanerusumik piumaffigineqarutta, aningaasartuutillu matussutissaqarpata, soorunami taamaaliussaagut, Christian Keldsen, oqarpoq. Naak kiffartuussinermut isumaqatigiissut 2010-p tungaanut atuukkaluartoq, Naalakkersuisut akunnerinnarmi allanngortitsiumappata, namminneq piareersimallutik Air Greenland A/S-ip nittaarsaassinermut pisortaa Christian Keldsen naggasiivoq.
