Air Greenland: Ilaasussat 580-it ilaat timmisartumik attartukkamik apuunneqassapput

KNR-imi tallimanngormat nutaarsiassiaraarput Airgreenlandimut ilaasussat 400-it kinguaattoortut.

Ilaasussallu kinguaattoortut sapaammi amerlanerulerput.

Airgreenlandimut ilaasussarpassuit sineriammi arlanni Danmarkimeersullu katillutik 580-it kinguaattoorput, nunatta annersaani silarlunnera ilaatigut peqqutigalugu. Ullumikkut sapaammi sila apeqqutaatillugu angallassisoqartoq Air Greenlandimit ilisimatitsipput.

Silarluk teknikilu kinguaattoortitsisut

Nunatta annersaani silarlunnera tamatumalu saniatigut tekniki peqqutigalugit Qaanaamiit Nanortalik tikillugu kiisalu Tunumiit Danmarkimiillu Airgreenlandimut ilaasussat katillutik 580-it kinguaattoorput. Ullumikkulli ilaasussat ilaat apuuffissaminnut apuunniarneqartut Inga Dora G. Markussen, Airgreenlandimi paasissutissiisartoq oqarpoq:

- Tassa ullumikkut timmisartut kinguaattooraluarlutik Nuumminngaanniit qangattallaattaapput. Kangerlussuarmut Danmarkiliartussat tallimanngormalli eqqugaasut, taakkua ullumikkut Kangerlussuarmut immikkut ittumik timmisartumik Nice Air-imiit attartuigatta, taanna ullumi tikissaaq ualerulu Danmarkiliaasissalluni.

Sinerissami ilaasussat utaqqisut pillugit Ingadora G. Markussen ima oqarpoq:

- Tassa timmisartuussinerit pilersaarutaareersut ullumikkut ingerlanniarsarivagut, timmisartuussinerit tamaasa naammassiniarsaralugit. Timmisartumik ataatsimik teknikertoqarpaluppoq, kisianni sinneri ingerlaarpalupput.

Isorliunerusut aamma kinguaattoorfiusut

Isorliunerusunut timmisartuussineq silarlummit teknikimillu kinguarsarneqarpoq. Tunumi timmisartuussinissaq kinguaattoornerusunnaavoq anorersuarnissaa aarlerisaarutigineqarmat.

Qaanaarlu aamma silarluppoq.

- Qaanaaminngaanniit timmisartuussinerit arleriarluni massakkut taamaatiinnarneqarput sila peqqutigalugu, ippassarlu timmisartoq Qaanaaliartussaq aamma utiinnartariaqarsimavoq teknikimik ajornartorsiuteqarluni. Ilaasussat pingasunngorpat Qaanaaliaanneqartussaassapput.

Nuup mittarfiani qulleeqqat ajoquteqarmata timmisartut Nuummut taarsereernerata kingorna suli missinnaanngikkallarnerat kinguaattoornermut aamma ilapittuutaasoq

Airgreenlandimi paasissutissiisartoq Ingadora Gudmundsdottir Markussen aamma oqarpoq.