Air Greenland bilitsinik akikitsunik tuniniaalerpoq
- Angalanissamik qanoq siusitsigisukkut pilersaarusiorneq apeqqutaalluni Air Greenlandip angallassiviini (kiffartuussinissamik isumaqatigiissuteqarfiit pinnagit) akit assigiinngitsorpassuupput. Aallarfissatullu siunniussap qanilliartornerani bilitsit akikitsut nungussimaratarsinnaapput, timmisartortitseqatigiiffik nalunaarpoq.
Taamatut angalanissanik akikitsunik tuniniaanerup siunertaraa Air Greenlandip ilaasunik akit apeqqutaatillugit angalasartunik, angalanissamillu pilersaaruteqanngikkaluanik angalajumalersitsinissaq, kiisalu Kujataani angallannermi unammilleqataanissaq angalajumasunillu tigumminniinnarusunneq.
Air Greenlandi Kujataaniit Danmarkimut piffissami juunip 19-aniit augustip 30-anut timmisartuussisassaaq, taakkulu Boeingimik Jettime-mit attartukkamik ingerlanneqartassapput.
