Air Greenland Atlantiku qulaallugu timmisartuusseqqilerpoq

Air Greenland sapaatip akunnerani kingullermi pingasunngornermili Danmarkimiit Kangerlussuarmukartitsigami aatsaat ullumi timmisartortitseqqippoq, timmisartorsuarlu Kangerlussuarmut nalunaaqutaq 10.38 tikissaaq. Taama ilisimatitsivoq Air Greenlandimiit Udo Glashoff.
apriilip 21-at 2010 05:29

Silaannakkut angallannermi Kalaallit Nunaanni oqartussaasuniit, Naviairimiit, nalunaarutit naapertorlugit allorniusat 66 ½ Nunatta qulaani ammarput. Taamaalilluni Kangerlussuarmi avannarpasinnerusumilu timmisartoqarfiit maannakkuugallartoq ammaqqinneqarput. Københavnimiit Pituffimmut attartukkamik ullumikkut aamma timmisartuussisoqassaaq. Tassani attartorneqassaaq Air Greenlandip timmisartorsua Airbus, Københavnimiillu Kangerlussualiassaaq Boeing.

Islandimi qaqqap anitsineranit qullaatsitat Københavnimi ajornartorsiutaajunnaaraluartut, ilaat Nunatsinnut anngupput, taamaammat Kujataani silaannakkut angallavik matoqqavoq, taamammat Narsarsuup Københavnillu akornanni pilersaarutit malillugit timmisartuussineq pisinnaanngilaq. Nuup Kangerlussuullu akornanni, angallaffiunerpaasumi, aamma angalasoqarsinnaanngikkallarluni.

Timmisartumik angalaniarlutik utaqqisut Air Greenlandip nittartagaa airgreenland.gl malinnaavigisinnaavaat, taannami nutarterneqartuarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq