Pingasunngormat ajutoortoqarnerata kingorna Air Greenlandip timmisartortartut suleriaasii qularnanngitsumik allanngortinniarpai. Tassa pingasunngormat qulimiguullip A-350-imik taaguutillip ikummatissaasivik timmisartup orsussaanik benzinamik 700 literimik imalik Nuup eqqaani Sermitsiap kangerluanut katattoormagu. Atuagagdliutit ullumikkut saqqummersut taama allaaserisaqarput.
Tamanna inuup kukkuneratigut pisoq, teknikkikkullu kukkunerunngitsoq paasineqarpoq. Timmisartortartup timmisartornermut nalunaarusiaq immersortillugu attataasaq kalitamik iperaasitsisartoq toortoorsimassagaa ilimagineqarpoq.
- Suleriaatsinik misissuilerpugut. Paasiniassavarput timmisartornermut nalunaarusiami aallattuiffimmik allattussanngoraangamik timmisartortartut allaanerusumik tulleriiaarisinnanersut aamma assartukkanut naatiffiup sarfaarnissaa isumannaallisaanikkut illersorneqarsinnaanersoq misissussavarput, timmisartornermut pisortaq Wilhelm von Platen AG-mut oqarpoq.
Tallimanngormat qatserisartut katatsiviusumukarput, Pinngortitaleriffimmeersunik marlunnik ilaqarlutik. Matumani orsussap katanneqartup kangerlummi uumasoqassutsimut akornutaannginnera qulakkeerneqarusummat.
- Appat mitillu uuliaarluernermit eqqugaasut oqorsaataaruttarput nunaliartarlutillu. Kisianni timmissanik nunamiittunik takunngilagut, timmissanik immikkut ilisimasalik Lars Rasmussen AG-mut oqarpoq.
