Air Greenland Akilinermut timmisartuussisaleqqikkusussinnaavoq
Takornarianik, aatsitassarsiorfimmi sulisunik allanillu timmisartuussineq akilersinnaassanersoq, timmisartortitseqatigiiffiup Air Greenlandip misissorpaa. Aallaqqaammut Nunatsinni Kangerlussuaq aallaavittut takorloorneqarpoq, Akilinermili mittarfik sorleq miffigisassaneraa suli aalajangerneqanngilaq, aviisi Sermitsiaq ullumi saqqummersoq taama allaaserisaqarpoq.
- Aatsitassanik uuliamillu ujaasinerit aallartilluareerput. Suliniutit tamakkua sammisaqarfinnut arlalinnut siammaakkiartorpasipput. Suliffissuaqarnermillu ingerlatat taamaattut piffissaq ungasinnerusoq isigalugu timmisartuussivimmut niuernikkut tunngaviliisinnaapput. Piviusorpalaanngilaq isumaqassalluni takornariat kisimik timmisartuussivimmut tunngaviusinnaasut, Air Greenlandip pisortaanera Michael Binzer oqarpoq.
Nunatsinnit akitsinnut Canadamut timmisartuussisarneq 2001-imi matuvoq, USA-mullu Baltimore-mut aasaanerani timmisartuussisarneq, ukioq ataaseq qaangiutiinnartoq 2008-mi matuneqarluni.
Naalakkersuisut siulittaasuat inatsisartut ukiaanerani ataatsimiinnerat aallarnerlugu oqalugiaammini neriorsuinngikkaluarluni Akilinermut timmisartuussisoqaqqittalernissaa oqaatigaa.
- Amerikamut Avannarlermut ukiorpaalunngortuni timmisartukkut attaveerussimanerput eqqarsaatigalugu, kimmut Canadamut timmisartukkut attaveqarnerup ammarneqarnissaa qanilliartormat nuannaarutigaarput, Kuupik Kleist oqarpoq.
