Air Greenland 40,8 millioni koruuninik sinneqartoorpoq

Timmisartortitseqatigiiffik Air Greenland siorna pitsaasumik angusaqaqqippoq, akileraarutit peereerlugit 40,8 millioni koruuninik sinneqartoorami. Iluanaarutit 2004-mut naleqqiullugit ikinnerupput, taamanikkut 64,7 millioni koruunit sinneqartoorutigineqarmata.

Air Greenland sinneqartoorluarpoq ikummatissap akia qaffassimagaluartoq. 2004-mut sanilliullugu 25 millioni koruuninik ikummatissanut Air Greenland aningaasartuuteqarnerusimavoq. Aamma Atlantikoq qulaallugu bilitsit aappaluttut 7 procentimik, nunattalu iluani 14 procentimik akikillisarneri ingerlaannarsimagaluartut sinneqartoortoqarpoq.

Sinneqartoorluarneq Air Greenlandillu patajaatsumik aningaasaqarnera, nunatta iluani timmisartuussivinni bilitsip aappaluttup akia ukioq manna marsip aallaqqaataaniit 8,3 procentimik akikillinissaannut periarfissiipput. Takuss’ bilitsimut ukiuunerani akigitittagaq sinersortumik taasagaq, timmisartuussivinni ukioq naallugu aamma atuutilersinneqarpoq.

Air Greenland-ip pigisai A/S Hotel Arctic, Grønlands Rejsebureau A/S-ilu aamma naammaginartunik angusaqarput.

Air Greenland apriilip aallaqqaataani ileqquusumik ataatsimeersuassaaq.