Ahmedinejad: Allamiut toqussimassavaat
Iranip præsidentia, Ahmedinejad ullumi oqarpoq, ilinniarnertooq arnaq inuusuttoq akerliussutsimik takutitsisut namminneq imaluunnit naalagaaffiit allat kilitsissiaasa toqussimassagaat. Ilinniarnertuup, Soltan Neda-p toqutaanera Iranimi aalassassimaarutigineqaleruttortoq, præsidentip oqaasii tupaallaatigineqaqaat. Iranimi præsidentimut qinersisoqarnerani qinersisut 10 procentiisa kiseqqissaarneqarnissaat, Iranimi pissaaneqarnerpaat ilaasa palasit ullumi aallartisippaat.
Arnap ilinniarnertuup toqutaaneranit assilisat nunarsuatsinni tusagassiivinniit assigiingitsorpassuarniit takutinneqaqattaarpoq. Soltan Neda-p toqutaanera akerliussutsimik takutitseqattaartunit pilliutigineqartutut isigineqarpoq. Nakorsarmi annaassiniaraluartoq BBC-mut oqarpoq, sakkutooqatigiit Bashi-mik taagorneqartut arnaq aallaasimassagaat ilimagalugu. Ahmednidejad-ili ullumi oqarpoq, Soltan Neda kilitsissiat arlaannit imaluunniit naalagaaffiup Iranip akeraanit inuartarineqarsimassasoq, taakkualu imminut pilliutigisumik nittarsaassaqarniassagamik inuartarinnissimassasut. Arnap ilinniarnertuup inuartarineqarnera tamanit maluginiarneqaqimmat, Iranimi pisortat qanoq iliuuseqarfigissanerlugu pissusiileqinerat ersarissiartuinnarpoq. Tusakkallu naapertorlugit Soltan Neda-p ilaqutai angerlarsimafimminniit anisinneqarsimapput, arnallu ilisaanissaata ilaqutaanit aaqqissorneqarnissaa inerteqquatigineqartoq aamma nalunaarutigineqarpoq.
Præsidentimut qinersinermi qinersisut 10 procentiisa kiseqqissaarneqarnissaat pisortat piumasarigaluaraat, tamassuma sumut iluaqutaasinnaanera takujuminaatsinneqarpoq. Qullersammi Ahmedinejad ajugaarujussuarnerarlugu suaarutigereermassuk.
