Agnethe Nielsen: Elisipannguup uteriitsuusimanera kingulliarsuit ilinniarfigisinnaavaat

Landsrådet-mi arnartatuaasimasoq juumooq Elisabeth Johansen, Elisipannguaq, ullumikkut 100-liisussaagaluarpoq, inuusuttullu ullumikkut ilinniarfigisinnaasaat tassaavoq, ajunngitsunik anguniagaqaraanni qanorluunnit aporfissaqartigigaluarpat uteriittarnissaq.

- Inuttut nuannersuuvoq aamma aalajangersimasuuvoq. Pikkorissuuvoq. Isummani eqqortuusorisani anguniartarpai killissaa tikillugu. Arnaq imaannaanngitsoq pillugu Elisabeth Johansenimut ikinngutaalluarsimasoq 82-inik ukiulik Narsami borgmesteriusimasoq inatsisartunilu ilaasortaasimasoq Agnethe Nielsen taama oqarpoq.

Elisabeth Johansen taaniarneqartarpoq “landsrådip angutitatuaa”, sumik tunngaveqarpamita?

- Eqqortuuvoq, Elisipannguaq aalajangiussaqaraangami ilungersuullugulu ilungersuasarsimaqaaq. Aamma taamani anguterpaat akornanni arnat ikitsuinnaapput, taamani arnat angutit akornanni sulisuusugut atugarissaaginnarneq ajorpugut. Taamaattumik qularnanngitsumi Elisipannguup arnaanini pillugu isumai ilaannikkut soqutigineqarujussuartarsimanavianngillat, nalunngilaralu taamaaligaangat piumassuseqarnini sakkortuumik takutittarsimagaa. Taamaattumik landsrådip angutitatuaatut oqaasertalerneqassappat tupiginngilara. Agnethe Nielsen nassuiaavoq.

- Kingulliunerusut ilinniarfigisinnaavaat, arnaq isummaminik aalajangiussisimasoq pineqarmat, inuiaqatiminut sulissussiumaneq annertooq pigaa allaallu atugarliutigigaluaruniulluunnit ilungersuussani anguniartarsimavai. Taanna ilinniarfissarujussuuvoq marluullutalu oqallittarsimanitsinni assortuuttarnigut eqqarsaatigalugit aamma ilinniarfigisimavara. Agnethe Nielsen oqarpoq.

Elisabeth Johansenip eqqaamaneqaatigisaasa ilagaat, nunaqarfinnik matooraluni illoqarfinnut nuutsitsinissamut akerliusimanera, taamatuttaaq sumik inunngorsimaneq tunngavigalugu akissaasersuilernissamut qinikkani kisiartaalluni akerliulluni taasisimavoq.