Agnethe Davidsenimut eqqaaniaalluni oqaatsit
Hans Enoksenip oqaasii
Inummik malunnaatilerujussuarmik annaasaqarpugut
Tupannaqisumik attortissutigingaakkatsinnillu nalunaarfigineqarpugut ikinnguterput suleqaterpullu Agnethe Davidsen akornatsinniikkunnaarluni toqukkut qimaguttoq.
Qitornai, erngutanngui, ilaqutai ikinngutaalu atukkassinni artornangaartumi eqqarsaatitsinni najorlusi misiginneqatigingaarpatsigit. Inummik angisuumik sunniuteqartumik tamatta annaasaqarpugut minnerunngitsumillu Nuummi innuttaasugut ningioorsertutut misigisimanitsinni ilissi ilaqutaasusi eqqarsaatitsigut najorpassi.
Agnethe angisuumik qutsavissaraarput. Politikkeritut ilisarnaatigaa imminut salliutinnani innuttaasullu atugaasa pitsaanerulersinneqarnissaat nunallu ineriartortuarnissaata salliutinneqartuarnissaanik sulissutiginnittuarnini. Minnerunngitsumik meeqqat inuusuttullu atugaannik pitsanngorsaajuarnissaq pingaartitaasa annerpaat ilagaat.
Piffissami matumanerpiaq Agnethe Davidsen-ip qimagutiaarpallaarnera annaasaqaataavoq annertooq. Kommunit aaqqissuuteqqinneqarnissaanni suliarujussuarmi Agnethe Davidsen sunniuteqarsimaqaaq. Suliap ingerlanneqartuarnissaanik siuttuulluni qularnaarinneqataasimavoq, mannalu pissutsinut nutaanut ikaarsaarialernermi maqaasisassinneqarpugut imaannaanngitsumik.
Agnethe Davidsen ukiorpassuanngortuni Nuup Kommuneani borgmesteritut sulisimagaluarluni nuna tamakkerlugu politikkikkut sunniuteqarsimavoq. Arnani siullersaalluni Naalakkersuisuni ilaasortaasimavoq Inatsisartunilu qinigaaffinni arlalinni ilaasortaasimalluni. Suliamini tamani aalajaalluinnarluni, tatiginarluni ataqqinnittumillu pissuseqarluni suliniartuuvoq.
Inuuvoq isumassanik nutaanik ujartuiuartoq, sullerissoq isummaminillu ajunngitsuusorisaminik pimoorussisartoq. Nuannaartitsillaqqissuuvoq inoqatiminullu qiimanermik ingerlatitseqqittarnera Agnethemik suleqatiginnissimasunit qanitarinnissimasunillu tamanit mikinngitsumik maqaasineqartussaavoq.
Agnethe Davidsen-ip eqqaaneqarnera ataqqinartuuli.
Hans Enoksen
Naalakkersuisut siulittaasuat
Jonathan Motzfeldtip oqaasii
Inuk imaannaanngitsoq, politikeri imaannaanngitsoq aqutsisorlu nukittooq Kalaallit Nunaata annaavaa.
Inatsisartunut ilaasortap borgmesterillu Agnethe Davidsenip ilimaginngisatsinnik tassanngaannaq qimagunneratigut nunami maani najugaqartugut tamatta imaannaanngitsumik maqaasisassaqalersinneqarpugut.
Aaqqissuussaanermik iluarsaaqqinnermi nunarsuarmi kommunit anginersaannik pilersitsinissami paasisimasaqarluartuunini, siumut takorluugaqarluartuunini aqutsisinnaassuseqarluarninilu piffissami aggersumi Kalaallit Nunaannut iluaqutissanngortittussanngoraluarlugit Nuup borgmesteria, suliumatuutut, sunniuteqarluartutut pingaartitaalluartutullu, ukiut qulit sinnerlugit borgmesterioreerluni qimaguppoq.
Kalaallit Nunaata ineriartorneranut iluaqutaanerpaasussaq angujumallugu borgmester Agnethe Davidsen 2005-imi qinersinermi Kalaallit Nunaata Inatsisartuinut ilaasortatut atuutilerpoq. Tamanna pivoq nunarput tamakkerlugu kommuninilu Kalaallit Nunaata siunissaa pillugu anguniagassatut siunniussanik pingaarutilinnik aalajangigassat piviusunngortitsinissallu peqataaffigisinnaajumallugit. Inatsisartunut ilaasortaq borgmesterilu Agnethe Davidsen aaqqissuussaanermik iluarsaaqqinnermut nunatta atorfissaqartitaatut isigisaminut aalajaatsumik piumassuseqqortussutsi siunissamullu ersarissunik takorluugaqarsinnaassutsi iluaqutissanngortissimavai. Kalaallit Nunaanni kommunit anginersaattut pilersaarut annertooq Agnethe Davidsenip nammineerluni siuttuuffissamisut tigusimavaa.
Agnethe Davidsen inersimasutut inuunini tamakkerlugu inuiaqatigiinni kalaallini pingaarutilinnik atuuffeqartarsimavoq. 1960-ikkut naajartorneranniit eqqartuussivimmi sulisutut eqqartuussisutullu atuutereerluni 1983-imi isumaginninnermut tunngasunut Naalakkersuisutut pissusissamisoortumik atuutilerpoq. 1989-imiit ukiut marlussuit Nuummi kommunalbestyrelsimeereerluni 1993-imi Agnethe Davidsen borgmesterinngorpoq toqunissilu tikillugu taamatut atuulluni.
Agnethe Davidsen qinigaaffinni marlunni 1995-imiit 97-imut aammalu 2005-imiit toqunissi tikillugu Kalaallit Nunaata Inatsisartuinut ilaasortaavoq. Atuuffini allat aqqutigalugit, inooqataanermigut inuiaqatigiinnilu akuunermigut, siunissamut ersarissunik takorluugaqarnermigut sakkukillinngisaannartumillu sunniuteqarnermigut Agnethe Davidsen sulinermini inuiaqatigiissutsitsinni arnaasimavoq maligassiuisoq.
Qinikkatut sulinini tamakkerlugu Agnethe Davidsen partiimut Siumumut sinniisuujuarsimavoq. Kalaallit Nunaata oqaluttuarisaanerani Agnethe Davidsen arnanit qinikkanit sunniuteqarnerpaasimammat qularutigineqassanngilaq. Atuuffigisimasamini tamani Agnethe mikinngitsumik maqaasineqassaaq. Agnethip qimagutiaarpallaarneratigut Kalaallit Nunaat inuiaallu kalaallit taarserneqarsinnanngitsumik annaasaqarput.
Kalaallit Nunaanni Inatsisartut sinnerlugit Agnethe Davidsenip toqunerani aliasungaarnerput ersersikkumavara. Agnethip ilaqutai ikinngutaalu eqqarsaatitsigut najorlugillu misigeqatigaavut.
Siumut Nuuk-p eqqaaniutitut oqaasii
MISIGINNEQATIGINNISSUT
AGNETHE DAVIDSEN-imut eqqaaniut
Ullaaq 25. november 2007 tupatsitaaqaluta tusartinneqarpugut illoqarfitsinni Borgmesterinnguarput asasarput Agnethe Davidsen toqukkut qimaguttoq.
Ilaqutaasut ernutaalu qamannga pisumik misiginneqatigingaarlugit inuulluaqquniarpavut.
Inuk arnaq nukittooq annaasarput illoqarfittalu Anaananngua erlinnaraluaqaluni tassanngaanaq qimaguttoq paasiuminaaqaaq.
Suliai imaanaangeqisut eqqaamajuassavagut uummatimigullu illoqarfik Nuuk nuannersoq najoruminartorli kissaatigiuarsimasaa ataqqillugu ingerlateqqissavarput.
Nuannaarluni tulluusimaarlunilu Kommuneni qimappaa. Qiimanerata nuannaarumajuarneratalu najortuassavaatigut inuk asannittoq aalajaatsoq nukittooq. Asasatta massakkut annaasassarinngisatta qimappaatigut.
Siumut Nuuk sinnerlugu Agnethe Davidsenip toqunerani aliasungaarnerput uaguttaaq ersersikkumavarput. Agnethe-p ilaqutai ikinngutaalu eqqarsaatitsigut najorlugillu misigeqatigaavut.
Ivittuut Kommuneat sinnerlugu
MISIGINNEQATIGINNISSUT
AGNETHE DAVIDSEN-mut eqqaaniut
Ullaaq 25. november 2007 tupatsitaaqaluta tusartinneqarpugut illoqarfitsinni Borgmesterinnguarput asasarput Agnethe Davidsen toqukkut qimaguttoq.
Ilaqutaasut ernutaalu qamannga pisumik misiginneqatigingaarlugit inuulluaqquniarpavut.
Inuk arnaq nukittooq annaasarput illoqarfittalu Anaananngua erlinnaraluaqaluni tassanngaanaq qimaguttoq paasiuminaaqaaq.
Suliai imaanaangeqisut eqqaamajuassavagut uummatimigullu illoqarfik Nuuk nuannersoq najoruminartorli kissaatigiuarsimasaa ataqqillugu ingerlateqqissavarput.
Nuannaarluni tulluusimaarlunilu Kommuneni qimappaa. Qiimanerata nuannaarumajuarneratalu najortuassavaatigut inuk asannittoq aalajaatsoq nukittooq. Asasatta massakkut annaasassarinngisatta qimappaatigut.
Siumut Nuuk sinnerlugu Agnethe Davidsenip toqunerani aliasungaarnerput uaguttaaq ersersikkumavarput. Agnethe-p ilaqutai ikinngutaalu eqqarsaatitsigut najorlugillu misigeqatigaavut.
Siumut sinnerlugu
EQQAANIUT
Ikinnguterput asasarput Agnethe Davidsen toqukkut qimaguppoq
Suleqaterput, ikinnguterput asasarput Nunatta Inatsisartuini Ilaasortaq, Nuup Kommuniani Borg-mesteri Ilaqutariinni ningioq ataqqinartoq Agnethe Davidsen ippassaq 25. novembari 2007 toquk-kut qimaguppoq.
Anniita arnaavoq nukittooq inuit tamatta sumiikkutta ajunngitsumik atugaqarnissatsinnik pingaar-titsisoq suliniuteqartuartorlu, inuit tamatta ataatsimoornissatsinnik ilungersuuteqartuartoq. Anniita inuugallarami qiimmassaajuartuusimavoq allaat naalakkersuinikkut sulinitsinni erloqinarsinnaasar-tut suliarinerini suliassanik oqinnerulersitsisumik sunniuteqartarnera tamatta eqqaamasassavarput.
Anniitap eqqaamaneqaatissaasa annerit ilagaat meeqqanut, inuusuttunut, utoqqarnut, aammalu inu-iaqatigiinni sanngiinnerusunut tamanut malunnarluartumik asannittuunini taakkulu pillugit tunuar-simaanngilluinnarluni suliniuteqartuarnini.
Anniitap toqukkut qimagunneratigut arnamik imaannaanngitsumik nukittuumillu Siumumi Inuia-qatigiinnilu annaasaqarpugut.
Anniitap ilaqutannguinut ikinngutaanullu uummammik pisumik misiginneqataanerput tigoqquarput.
Anniita tamatta sivisuumik maqaasissavarput.
Anniitap Eqqaaneqarnera ataqqinartuuli.
Hans Enoksen Ruth Heilmann
Siumup siulittaasu Siumup gruppia sinnerlugu
