Agnethe Davidsen amigaataavoq

Tusagassiortoq Elna Egede qinersinermik naliliisipparput, taanna aperaarput kommunerujussuanngornissami avannaa, kitaa, kiisalu kangia-kitaa sorliit pissanganarnerpaasorinerai.

- Kommunit marluk pissangarnerpaatippakka tassalu kangia-kitaa taavalu kujataata kommunia. Avannaata qeqqatalu kommuunii annertuumik Siumukkunnik tunuliaqutaqarput, partiillu allat taakku pillugit ajornartorsiuteqartarput, Elna Egede naliliivoq.

Taassumali erseqqissaatigaa Kangia-Kitaa eqqarsaatigalugu Nuummi borgmesteriusimasoq Agnethe Davidsen amigaataasorujussuusoq.

- Agnethe Davidsenip piginnaaneqarfigisimavaa Nuummi aqutsinermi kikkut tamaasa suleqatigisinnaallugit aamma partiit allaagaluarpataluunniit. Agnethe annertuumik katersuuffiusimavoq. Maannalu pissanganartoq unaavoq kangia-kitaani qinersineq qanoq inerneqassanersoq, Elna Egede oqarpoq.

Nangipporlu:

- Agnethe Davidsen kommunit kattussuunnissaannut qimuttuusimavoq, taamatuttaaq ukiualuit matuma siornatigut partiit maaniittut katersorsimavai ataatsimoortillugit. Taamaalilluni aaqqissuussinissamut nutaamut peqataatillugit, tamatumalu saniatigut kommunerpaaluit aamma katersorsimavai, Elna Egede oqarpoq.

Taanna aperaarput Agnethe Davidseniugaluup pissaanerata kimittussusaa utersaartinneqaqqissappat qanoq iliortoqarsinnaanersoq.

- Apeqqutaavoq qinersinerup inernera qanoq issanersoq. Aammalu Agnethe Davidsenip qinersisartorpassui sorlermik qinersissanersut apeqqutaalluinnarpoq. Taamatuttaaq apeqqutaalluinnarpoq partiit imminnut qanoq suleqatigiissinnaanerat. Uangalu ilimaginngilara partiit arlaannaataluunniit amerlanerussuteqarnissaa, taama oqarpoq tusagassiortoq Elna Egede.