Agnethe Davidsen: Akissarsianik isumaqatiginninniartalerusuppugut!
- Ullumikkut kommunit taakkua sisamanngortussat tamarmik assigiimmik aamma oqariartuutigivaat tupinnanngitsumik, aningaasarsiornikkut siuariartornissaq assigiinngitsutigut suliniutigalugu, tassami taamaaliunngikkutta ilaa suulluunnit akisussaaffittut tigusassatta ingerlanniarnissaannut akissaqarnaviannginnatta, Agnethe Davidsen oqarpoq.
Akisussaaffiillu kommunerujussuarnit tiguneqarsinnaasutut siunnersuutigivaa, kommunit sulisumik akissarsiaannik isumaqatiginninniarsinnaaneq.
-Ilaatigut aamma aningaasarsianut tunngasut, kommunit massakkut sulisumi aningaasarsiaqartinneranut isumaqatiginninniartarneq KANUKOKAminngaanniit kommunit tamaasa sinnerlugit ingerlanneqartarpoq, Agnethe Davidsen oqarpoq.
Taamatullu ingerlariaaseq kingaannerarpaa, tassami kommunimi sulisut akissarsiaat ukiuni arlalinni akissarsiassaat isumaqatigiissuteqarfigineqarneq ajormata.
Naalakkersuisut siulittaasuata akissarsianik isumaqatiginninniartarnerup kommuninut tunniunneqarneratigut, akissarsiat kommunini assigiinngitsuni naleriikkunnaarnissaa aarleqqutigalugu isumaqatiginngilaa.
-Naalakkersuisut siulittaasuat nassuiaalluarneqarneruguni, immaqa paasinninnerusinnaavoq, uani kommunet immikkoortitaarlutik isumaqatiginninniartassanngimmata, kisianni ataatsimoorlutik, Agnethe Davidsen oqarpoq.
-Ajunngitsumik kommunerujussuit taakku sisamat ingerlassappata, aamma pingaaruteqarpoq sulisorisat pikkorissut pissarsiarineqarsinnaanissaat, ullumikkut akissarsiat taama isikkoqarallartillugit sulisorisassat pikkorissut pissarsiariuminaattartorujussuusarput, Agnethe Davidsen oqarpoq.
Kommunerujussuassat akisussaaffigilerumaagaai pillugit borgmesterit kommunaldirektørillu naalakkersuisunik oqaloqatiginnikkumallutik ullumi siunnersuuteqarput.
