Aggertukikkaluartoq Narsami Demokraatit immikkoortortaarusupput

Demokraatit Narsami immikkoortortassaanik pilersitsiniarluni innuttaasunik aggersaanermi takkuttukikkaluartoq, immikkoortortaarnissaq pimoorunniarneqarpoq, taamaattumillu suleqatigiissitaliortoqarluni.

Narsami Demokraatit immikkoortortassaannik pilersitsinissaq siunertaralugu Narsami innuttaasunik ippassaq aggersaasoqarpoq. Naallu takkuttut arfineq-marluinnaasimagaluartut, Atassummi ilaasortatoqaasimasup, ataqqinaammillu ilaasortaasimasup, Demokraatillu immikkoortortassaannik pilersitsiniaqataasup, Torben Emil Lyngep ataatsimiisitsineq iluarisimaarpaa.

- Qinersinermi kingullermi Narsap illoqarfiani innuttaasut 500-nit ikinnerunngitsut Demokraatinik taasipput. Qinerseqqittoqarpallu isumalluangaaratta ikinnerpaamik affangajaalluunniit Demokraatinik qinersinissaat ilimagaarput, Torben Emil Lynge oqarpoq.

Demokraatit immikkoortortassaanik aallartitseriarnissamut siulersuisuugallartunik pilersitsisoqarpoq. Siulersuugallartut inuttarai, Torben Emil Lyngep saniatigut, siornatigut aamma Atassummi ilaasortaasimasoq, Orla Rødgaard kiisalu Judith Hard Peilmann.