Coronavirusi Afrikami akiuussutissaaleqiffioreersumi tuniluutileqqerataannaasoq
Coronavirusip pingajussaanik tuniluutilertornissaa Afrikami nunat pinngitsoortinniarsaraat.
Taassuma saniatigut akiuussutissanik Afrikamut pilersuinerit uninngasutut nalilerneqarlutik.
Naalagaaffiit Peqatigiit peqqissuunissaq pillugu suleqatigiiffiata WHO-p Afrikami immikkoortuata qullersaat Matshidiso Moeti taama mianersoqqussuteqarpoq. Aviisi The Guardian ataasinngornermi taama allaaserisaqarpoq.
Afrikami nunani 14-ini coronavirus tuniluutilertoqqilersimasoq WHO-p nalunaarutigaa, coronavirusillu tuniluunnera nunani arfineq-pingasuni 30 procentit sinnerlugit annertusisimalluni.
Afrika nunat tamalaat coronavirusimut akiuussusiinermi suleqatigiinnerat Covax aqqutigalugu akiuussutissanik 50 millioninik pissarsisimavoq, taakkunannga 31 millionit nunani 50-ini tunniunneqarsimallutik. Afrikami innuttaasut katillugit 1 milliardit sinnerpaat.
Afrikami Saharamit kujammut innuttaasut 2 procentit ataallugit akiuussuserneqarsimapput.
Coronavirus Indiami qanittukkut tuniluuttorujussuanngorpoq, Afrikamili ajornerusumik pisoqarnissaa atorfilittat nuimasut ernummatigaat, Afrikamimi nunat amerlasuut peqqinnisaqarfii ilaatigut Indiamut naleqqiullugu aaqqissugaanerlunnerummata.
Inuit 5 millioningajaat coronavirusimik tunillatsissimasutut Afrikami pisortatigoortumik nalunaarsorneqarsimapput, 130.000-niillu amerlanerusut nappaat toqqutigisimallugu.
Nunarsuarmi tunillanneqarsimasut 2,9 procenteraat, toqusullu 3,7 procenteralugit.
Tunillanneqarsimasulli toqusimasullu ilimagisamit amerlanerujussuusut immikkut ilisimasallit amerlasuut ilimagaat. The Guardian taama allappoq.