Afrikap avannaani Tunesiami eqqissiviilliorput
Minnerpaamik illoqarfinni avinngarusimasuni pingasuni perulluliortoqarpoq, illoqarfiillu pingaarnersaanni Tunisimi akerliussutsimik takutitsisut politiillu aporaattarsimallutik.
Oqartussat illoqarfiit pingaarnersaanni innuttaasunik unnukkut unnuakkullu aneqqusiunnaarput. Tamatuma siuninnguatigut perulluliornerit unitsiiminiarlugit, præsidentip paarnaarunneqarsimasut tamaasa iperagaatippai Nunamilu namminermi Naalakkersuisoq soraarsillugu.
Perulluliortoqarnerani manna tikillugu minnerpaamik inuit 23-t politiinit toqutaareerput.
Præsidentip pissaaneqarnera annikilliartuinnarpoq, imaassinnaavorlu tunuartariaqalersinnaasoq. Tunesiap oqaluttuarisaanerani nutaanerusumi, maannakkut pisut aatsaat taama sakkortutigipput. Inuusuttut akornanni suliffissaaleqinerujussuaq pissutigalugu
akerliussutsimik takutitsinerit aallartipput, maannakkulli aamma Naalakkersuisut naqisimanninnerat isornartorsiorlugu perulluliortoqalerluni. Arabiamiut naalagaaffeqarfiisa akornanni Tunesiami naalakkersuisut naqisimanninnerpaapput; tusagassiuutit tamaasa aquppaat, inuit hunnorujut arlallit naalakkersuinikkut eqqarsartaasertik pillugu paarnaarunneqarsimasut naalliutsitaajuarput, innuttaasut katerisimaaqqusaanngillat il. il. Taamaammat ingasattorujussuarmik naqisimannittutut oqaatigisariaqarput. Taakkualu saniatigut Naalakkersuisut iluarnerusumik isigineqarnissartik anguniarlugu sunniiniartorpassuarnik sulisoqarput. Maannakkulli pisut takutippaat innuttaasut naqisimannittunut qunujunnaarsimasut.
Nunat assigiinngitsut nunanut allanut naalakkersuisoqarfii Tunesialiarniartunik mianersoqqusipput. Ippassaaniinnaq Italiamiut TV-kkut aallakaatitassiortut pikattarneqarsimammata, ingammik politiit qunugineqqarput, aallaasersortullu aqerluinit eqqorneqariataarsinnaammata maanna Tunesiamiittut angalaarusuppallaanngillat.
- Taamaammat inuit sulinngiffimminni Tunesialiarnissaat inassutiginanngilaq, Tunesiami pissutsinik ilisimannittoq Mark Schade Poulsen, inuit pisinnaatitaaffii pillugit suliniaqatigiiffiup, Euro-Mediterranean Human Rights Network-imi pisortaa DR-imeersumit persorneqarluni oqarpoq.
