Afrikami arnat pisinnaatitaaffeqarnerulernissaat itigartippaa

Inatsisissatut siunnersuut inatsisartunut ilaasortanut præsidentimit utertinneqarpoq, inatsisisatullu siunnersuut mississuataaqqissagaat præsidentip piumasarisimallugu, taamatut tusarliivoq nutaarsiassaqartitsivik BBC.

Inatsit arnat pisinnaatitaaffeqarnerulernissaanik periarfissiivoq upperisarsioqatigiilli muslimiusut akornanni akerlerineqarluni.

Arnat pisinnaatitaaffeqarnerulernissaannik inatsisissatut siunnersuummi, upperisamut Islamimut ileqqutoqqanullu akerliusutut Mali-mi musliimit aqutsisunit isigineqarpoq.

Arnat pisinnaatitaaffeqarnerulernissaannik inatsisit Mali-mi inatsisartuni akuersissutigineqareersoq, præsidentimit itigartitsissutigineqarpoq, nunami innuttaasut akornanni avissaartuuttoqannginnissaa eqqarsaatigalugu.

Inatsisissamut siunnersuutip præsidentimit itigartitsissutigineqarnera, Malimi arnat suliniaqatigiiffianni assigiinngitsuni aalassatitsivoq, taakkumi ukiut qulit sinnerlugit inatsisip allanngortinnissaanut suliniuteqarsimammata.

Arnat pisinnaatitaaffeqarnerulernissaannik inatsit qaammatip uuma aallartisimalernerani inatsisartunit akuersissutigineqarpoq. Inatsimmi tassani arnat uiviminnut naalattussiaannartut inissisimajunnaartinneqarput.

Aappariit imminnut illersoqatigiillutillu ataqqiqatigiinnerunissaat inatsimmi anguniarneqarpoq.

Arnat kingornussisussaatitaanermikkut periarfissaqarnerulissapput, amerlanerillu 18-leereerunik aatsaat katissinnaalernissaat inatsimmi periarfissiilluni, nutaarsiassaqartitsivik BBC taamatut allaaserisaqarpoq.