Afrikami kaannersuaqalernissaa aarleqqutigineqartoq
Afrikap kujasinnerusortaaniittut inuit 45 millionit panernersuaqarnerani qarsutsinersuaqarnerani aningaasarsiornikkullu ajornartorsiuteqarneq pissutigalugu inuussutissanik piaartumik pisariaqartitsipput, Naalagaaffiit Peqatigiinni immikkoortortami pisortaq oqarpoq.
- Kaannersuaqarpoq siornatigut takusimanngisatsinnik.
Sumilu tamarmi ajorsigaluttuinnarput, Lola Castro Naalagaaffiit Peqatigiit Inuussutissat pillugit immikkoortortami pisortaq taama oqarpoq.
Naalagaaffiit Peqatigiit inuussutissat pillugit suliniaqatigiiffia 500 millionit dollarsinik qinnuteqarsimavoq, kisianni taamaallaat 200 millionit dollarsinik neriorsorneqarsimalluni.
- Pisariaqartinneqartut pissarsiarinngikkutsigit, allatut ajornartumik ajornartorsiorluinnaqqissaartut ikinnerusut ikiortariaqassavagut, Castro sisamanngornermi taama oqarpoq.
Aningaasarsiornikkut ineriartortitsinnginneq, innuttaasut amerligaluttuinnarnerat, panernersuaqarneq, qarsutsinerillu pissutigalugit, Afrikap kujasinnerusortaanut inuussutissanik pilersuiniarnermut ajornartorsiortitsipput.
Nunat ingammik Swaziland, Lesotho, Madagascar, Malawi, Mozambique, Namibia, Zambia aamma Zimbabwe eqqugaanerpaapput.