Qulaarpaa Atuartitsinngitsoortarnerit erloqissutaasut

Tiimit atuartitsiffiit taamaatiinnakkat, ilinniartitsisullu napparsimakulasut. Pissutsit tamakku angajoqqaanit maluginiarneqartarput, atuarfinnilu aqutsisunik ernumatitsillutillu nalornisitsisarlutik.

Ilinniartitsisut napparsimakulasarnerat atuarfimmit atuarfimmut assigiinngitsorujussuuvoq, meeqqalli atuarfiisa nalilersorneqarnerannut atatillugu oqaaseqaatit atuaraanni ajornartorsiut annertoqisoq takuneqarsinnaavoq:

- Atuartut atuartinneqanngitsuukulasimaqaat, vikareqartarnerallu aamma annertulluni. Tamanna ernumanaqaaq. Meeqqat killilersorneqanngillat. Meeqqat atuanngitsoortartut aamma amerlapput. Soorlu aamma ilinniartitsisut napparsimakulasorujussuusut. Tiimit freerfiit amerlapput. Meeqqat atuarfiat pillugu peqqussut eqquutsinneqarsinnaanngilaq, tassami peqqussummik pimoorussisut killeqarmata, angajoqqaajusup nalilersuinermut atatillugu oqaaseqaateqarnermini ilaatigut tamakku oqaatigai.

Atuartut atuanngitsoortartut, ilinniartitsisullu napparsimakulanerat atuarfiit aqutsisuinit arajutsisimaneqanngilaq:

- Akisussaassuseqarnerusariaqaraluarput, tassami angajoqqaanit atorfinitsinneqarsimapput akileraarutitigullu akissarsiaqartinneqarlutik, meeraallu tassuunatigut atuartinneqartarlutik. Atuartitsinertillu paarisinnaanngikkunikku allamik suliffissarsiorpata pissusissamisuuginnassaaq, atuarfiit ilaanni aqutsisup naliliinermut atatillugu oqaaseqaateqarnermini tamanna oqaatigaa.

Ilinniartitsisut ilaasa atuartitsinerat ilaatigut killeqartoq, aqutsisut arlallit oqaatigaat, atorfinitsinneqarnertilli pissutigalugu soraarsinneqarsinnaanngitsut, ilinniartitsisussaaleqisoqarnerali immaqa pissutaalluni soraarsinneqarsinnaanngitsut aqutsisut naliliinerminni ilaatigut oqaatigaat.

- Meeqqat pillugit tamanna uggornaqaaq. Nukiit allatut atorsinnaagaluarpavut. Ilinniartitsisut akisussaassuseqarnerulersinniarlugit suliaq, kivitsiniarneq, ilungersunarsinnaavoq. Tassa ajornartorsiutima annersaat! Taavalu akissarsiatik piinnarlugit sulisut. Ilinniartitseriaatsinik anguniakkanillu naammassinnikkusunngitsut. Aqutsisinnaassuseqanngillat, atuartunillu eqqissiviitsunik aamma aqutsisinnaanatik, atuarfiit ilaanni aqutsisoq oqarpoq.

Ilinniartitsisunilli pimoorussisunik ilinniartitserusuttunik soorunami aamma peqartoq taassuma oqaatigaa:

- Ilinniartitsisut tamakku pissarsiarisinnaasuugaluarutsigik assersuutigalugu vikareqartitsinerpassuit pinngitsoortinneqarsinnaagaluarput, taanna oqarpoq.