Afghanistanimiut isumannaallisaanissaminnut piareersimanngillat

Qallunaat sakkutuuisa Afghanistanimit aappaagu angerlartinneqarnissaat Danmarkimi Socialdemokratit piumasarigaluarpaat.

- Afghanistanimiulli taama siusitsigisumi akisussaaffimmik taamaattumik tuniniaraanni ajornartorsiulissapput, Afghanistan pillugu ilisimasalik Peter Dahl Troelsen oqarpoq.

- Afghanistanimiut sakkutuuisa annikittualunnik suliaqartinnissaat ajornanngitsoq tappavaniikkama takuara. Kisianni annertunerulaartunik, soorlu ulloq unnuarlu sivisutigisumik suliarineqartussamik, suliakkinneqarnissaminnut suli piareersimanngilluinnarput, Peter Dahl Troelsen oqarpoq.

Afghanistanimiut sakkutuutik akersuutsikkiartoraangamikkik ilaanni nerisassaqartinniarneralluunniit ajornartorsiutigisarpaat, tassa pilersorneqarnissaat akersuukkiartornerisalu piareersarnissaat ajornartorsiutigisarpaat.

Socialdemokratit illersornissaq pillugu oqaaseqartartua, John Paulsen, isumaqarpoq, danskit sakkutuuisa aappaagu julip aallaqqaataani angerlartinnissaannut pilersaaruteqaraanni Afghanistanimiut nunaminni isumannaallisaanerup namminneq isumagilernissaa nukinngunnerulersinnaagaat.

- Afghanistanimiut nunaanni suliarisavut innuttaasa iluarivaat akisussaaffiulli tunniunneqarnissaa maanna piumasarilerpaat Talebanillu Afghanistanimiut sakkutuuinit akiorneqalerunik aatsaat nungukkiartulerumaartut Afghanistanimiut isumaqarput, John Paulsen oqarpoq.

Suliarli tamanna maanna suliarineqaleruttorpoq, Peter Dahl Troelsen-illu nukinngussiniarpallaarnissaq mianersoqqussutigivaa oqarlunilu:

- Sakkutuut nakkutigineqartariaqarput, soorlu naalakkersuinermik sulialinnit aamma nakkutigineqartariaqartut. Tamakku tamarmik ataatsikkut isumagineqartussaapput nukinngussiniarsarigaluaraannilu iluaqutaajunnanngilaq. Suna arlaat sukkavallaartumik ingerlanniarsarigaluaraanni sinneri katataaginnassapput. Tappavaniikkama suut tamarmik nukinngunneqarnerat malugaara suliassarli imaannaanngitsoq suli suliassaraarput, Peter Dahl Troelsen naggasiivoq.

Afghanistanimiut sakkutuuisa akisussaaffimmik tigusisinnaanissaat 2014-ip naanerani pisinnaasoq nunap præsidentiata Hamid Karzai-p nammineq naatsorsuutigivaa.