Afghanistanimi talibanit eqqisseqatiginiarneqalerput
Illoqarfiit pingaarnersaanni Kabulimi ulluni pingasuni ataatsimiittoqarnerani taama isumaqatigiissuteqartoqarpoq. Ataatsimiinneq taaneqarpoq "eqqisseqatigiinneq Jirga", tassaallunilu Afghanistanimiut ajornartorsiutinik aaqqiiniaraangamik periaaserisartagaat. Naalagaaffimmi sorsuunnerup maanna ukiut qulingiluassaannik ingerlanneqartup unitsinnissaa, ataatsimeeqatigiinnermi siunertarineqarpoq.
Ataatsimiinneq sioqqullugu Talibanit siuttuisa nalunaarutigaat, "eqqisseqatigiinnissamik Jirgamik" taasami Afghanistanimiut ilaatitaqanngitsut aamma nunani allamiut soqutigisaat illersorniaannarlugit ataatsimiittoqarnerarlugu. Ataatsimiinnerup ulluani siullermi ataatsimiittut imminut pilliutigaluni qaartartumeereriartumit qaartartumillu igeriuttakkamik saassunneqaraluarput, ajoqusertoqaratilli.
Præsident Karzaip eqqissinissamik anguniagaqarluni suliniuterpassuarnut ilanngullugu Talibanit siuttuisa ilaat nunani allani muslimeqarfiusuni qimaasutut akuerineqarlutik inissikkallarneqarnissaat neqeroorutiginiarpaa, taamaalilluni eqqissinissaq anguniarlugu isumaqatigiinniarniviit ingerlanneqarniassammata.
Præsidentip pilersaarutai, USA-p Afghanistanimi eqqissinerup qanoq anguneqarnissaanut pilersaarutaanit allaanerupput.
Tassami USA Talibanit illoqarfiisa pingaarnersaannut Kandaharimut sakkortuumik saassussiniarluni pilersaarusiuleruttorpoq.
