Afghanistanimi sakkutuuliussat amerlineqalerput
Tuluit amerlanerusunik Afghanistanip kujasinnerusortaani sakkutuuliiniarlutik aalajangerput. Tamaani sakkortuumik akersuuttoqarpoq. Tuluit illersornissamut ministeriata nalunaarutigaa tamaani eqqissisimatitsiniarneq navianartuusoq. Danskit sakkutuui 260-t sapaatip-akunneri arlallit qaangiuppata tamaannartinneqassapput.
Tuluit Afghanistanip kujasinnerusortaanukartut tupaallassimaqaat paasileramikku talibanit saassussisarneri qanoq sakkortutiginersut tamaammallu sakkutuunik sukkanerpaamik ikiortissarsiorput tuluillu sakkutuui 600-t missaanniittut sapaatip akunnerata tulliani ikiuiartortinneqassasut, tuluit aviisiini tusagassiortut allapput.
Tuluit sakkutuui arfinillit Afghanistanip kujasinnerusortaani sapaatip akunnerata ingerlanerani toqutaapput. Tuluillu illersornissamut ministeriata nalunaarutigereerpaa tamaani talibanit, pinerluttuliortartut ikiaroornartunillu naatitsisartut tuniniaasartullu saassussisaqattaartarmata eqqissisimatitsiniarneq navianarluinnartuusoq nangillunilu nalunaarutigaa tuluit eqqissisimatitsiniarmi saniatigut aqquserngit atuarfiillu sanaartoqqinnissaat suliarissarigaat.
Danskit illersornissamut ministeriata danskit sakkutuuisa navianartorsiortinneqarsinnaanerat ernummatigalugu nalunaaruteqarami oqarpoq saassussisaqattaaginnaratik Afghanistanimi aserukkanik aaqqissuusseqqinnissaq pingaarnerutittariaqaraluaritsik.
Taamatut nalunaaruteqarneq sakkutooqqinnerup soraarninngorsimasup illersornissamullu ilinniarfimmi ilinniartitsisup Mikael H. Clemmesenip isumaqatigilluinnarpaa:
- Massakkut Afghanistanimiut ikiaroornartoq annerusumik aningaasarsiutigaat. Tamanna allanngortinniarlugu maannangaaq iliuuseqanngikkutta aningaasaliisanngikkuttalu angusaqarpiarunnanngilagut. Talibanit Pakistanimut qimarratinnginniassammata Pakistanimut aningaasaliisoqartariaqarpoq kiisalu Naalagaaffiit Peqatigiit aqqani eqqissisimatitsiniarinitsinni ajutuussagutta nunarsuarmioqatigiit tamatta iluatitsinngitsoortussaagatta pingaaruteqarluinnarpoq taamatut aningaasaliisoqarnissaa, Mikael H. Clemmesen oqarpoq.
