Afghanistanimi qinersisoqalernerani tusagassiortut killilerneqarput
Qinersinermut atatillugu tusagassiuutit eqqissiviilliortoqarsinnaanera pillugu oqaluttuarnissaat naalakkersuisunit pinngitsoortinniarneqarpoq.
Aqagu qinersivimmi nakuuserneq qaartartumeerinerillu qinersisussap kialuunniit tusarunigit ungasissumiikkaluaruniluunniit annilaanngatigisinnaavai. Qinersisartut taamaattumik tamanna pillugu aqagu paasissutissinneqassanngilluinnartut Afghanistanimi naalakkersuisut oqarput tusagassiorfiillu qinnuigalugit
nakuusertoqarsinnaanera peqqarniisaarniartullu qaartartumeerisarsinnaanerat oqaluttuarinaveersaaqqullugit. Tassa imaappoq, Kabulip nunanut allanut ministereqarfiata tusagassiortunut nunani tamalaaneersunut tuluttut peqqussutigimmagu qinersiviit ammanerisa nalaanni talibanit qaartartumeerisinnaaneri nalunaarutigisaqqunagit. Nunalli iluani pissutsinut ministereqarfiup aqagu nakuusernerit suulluunniit tamaasa nalunaarutigineqarnissaat najukkami oqaatsit atorlugit inerteqqutigaa. Tamanna inuiaqatigiit soqutigisaraat, massakkut præsidentiusup aqagulu qineqqusaartussap oqaaseqartittagaa oqarpoq. Tusagassiorfiit tungaannit pitsaanngitsumik sunnerneqarnissarput pinngitsoorniarlugu qinersisartut akornanni pissuserissaarnissaq tapersersorparput qinersiartornissarlu ataqqillugu, oqaaseqartartoq oqarpoq. Suli ilisimaneqanngilaq naalakkersuisut qanoq iliorlutik inerteqquteqarneq peqqussuteqarnerlu atortinniassaneraat, tappavanili Human Rights Watchimi sulisoq oqarpoq, naalakkersuinerup aaqqissuussaanera tunngavigalugu Afghanistanimi naqisimaneqanngitsumik oqaaseqartoqarsinnaasoq. Afghanistanimi tusagassiortut illuinnaasiortuunngitsut peqatigiiffiat isumaqarpoq tamanna naalakkersuisut sanngiissusiannut ersiutaasoq, tusagassiortullu aqagu nalinginnaasumik suliartoqqullugit kajumissaarlugit.
