Afghanistanimi qinersisartut qinersisinneqaqqissapput

Afghanistanimi præsidentip Hamid Karzaip, qinersinermi peqquserluttoqarsimaneranik nalunaarusiaq akuereqqammerpaa, novembarillu arfineq-aappaani qinersisoqaqqissaaq.
Allattoq Elisa Isaksen
oktobarip 20-at 2009 11:34

Qinersinermi naammagittaalliuuteqartarfiup Naalagaaffinnit Peqatigiinnit tapersersorneqartup, qinersivinni 210-nik amerlassuseqartuni, qinersinerit tamaasa akueriumanagit ippassaq nalunaaruteqarpoq, taakkunanimi qinersinermi peqquserluttoqarsimanera erseqqissumik uppernarsaatissaqarmat.

Taamaalilluni qinersinerit 1,3 millioninik amerlassuseqartut atorsinnaanngitsutut oqaatigineqarput, taakkulu aggustimi qinersiartortut sisamararterutigaat.

Tamatuma kinguneranik Hamid Karzai qinersisiminik ima annaasaqartigaaq qinersinermi ajugaasutut imminut nalunaarutigisinnaajunnaarluni.

Hamid Karzai, Kabulimi tusagassiortorpassuarnik katersortitsinermini oqarpoq, qinerseqqittoqarnissaanik aalajangerneq nunap inatsisai tunngaviusut naapertorlugit aalajangernerusoq.

Karzaip qinerseqqittoqarani ataatsimoorussamik naalakkersuisoqatigiiliornissaq orniginerugaa tusatsiarneqaraluarpoq, præsidentimut qinigassanngortinnermini unammillertini Abdullah Abdullah naalakkersuisunik pilersitseqatigalugu.

Maannali tassa qineqqusaaqqissapput, novembarillu arfineq-aappaani qinerseqqittoqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq