Afghanistanimi qinersinissaq sioqqullugu nakuusertoqaqaaq
Ualilluinnaraa Khabulip tungaanut aqqusinertigut pujoralattutigut seqineq tarrilerpoq, tuniniaasut tuniniaavitik matooralerpaat, tuluit biilii nerisassanik pajuttut ingerlaaqatigiit sakkutuunit ingiallorneqarlutik qaangiupput taamaalisorlu qanngorpallappoq sumilu tamani uivernersuaqalerluni, kinguninnguatigullu ambulancet takkullutik annaanneqarsinnaasullu annaannialerlugit. Afghanistanimiut arfineq-marluk taakkunannga marluk FN-imi atorfillit, toqutaapput 50-illu missaanni ikiligaallutik. Suut tamaasa tunngavigalugit isummeraanni talibanini suliniaqatigiit aqaguagu qinersinissami Afghanistanimiut qinersinissaannik pinaveersaartinniarlugit peqqarniisaarniarnerisa tamanna ilagisimassavaat. Afghanistanimi mattusimanissaq naalakkersuinikkut nalunaarutigineqareerpoq taamaalillunilu politikkikkut ataatsimiittarnerit pisinnaajunnaarlutik, talibanilli tamanna anguniakkaminni eqqarsaatiginnginnguatsiarlugu. Ingasaassiniat unnuaq illoqarfimmiinnertik nalunaarpaat, illoqarfittullu pingaarnersap avatinnguanit inuit sinngunneranni rakettinik igeriusseqattaarlutik. Kingorna ilisarnaatit pingaarnersaat eqqorpaat, præsident Hamid Khasaip illussaarsuaqarfiata qanittua qaartartunit igeriuttakkanit marlunnit eqqorneqarmat. Saassussinerni marlunni taakkunani ajoqusertoqanngilaq.
Tusagassiortup Philip Cocardip maannakkut Khabulimiittup talibanit illoqarfiit pingaarnersaannik illoqarfinnilu allanik saassussisarnerpassui sisamanngorpat qinersinissamut assorsuaq ulorianaateqartutut taavai. Inuit ininut qinersivinnukarnissartik qunugaat. Akerlianilli pappiaranik qinersivissanik inuttullu ilisarnaatinik tuniniaanerujussuaq ullumikkorpiaq Afghanistanimi ulluinnarsiutaalersimasoq tupaallannartoqanngilaq.
Isumaqanngilanga tamanna kikkunnulluunniit tupaallaataassasoq, tassa Afghanistanimiut pappiaranik taasissutissanik inuttullu ilisarnaatinik pisiortorsinnaammata taamaalillutillu arlaleriarlutik taasisinnaallutik. Tamatuma sumiiffiit ilaanni atorneqartarnera nalinginnaasutut ilisimaneqarpoq. Oqallisaasorujussuaq aamma unaavoq qinigassanngortittut ilaasa kinguaariit ilaqutariillu sumiiffinni aalajangersimasuniittut imminerminnik taaseqqullugit peqquserlunnikkut qanoq iliortarneraat. Ullumikkut TV-mi kinguaariit pisortaat apersorneqartoq takuara, taannalu oqaluttuarpoq qineqqusaartut ilaata imminut qineqqulluni 10.000 dollarsit neqeroorutigisimagai, taavalu qineqqusaartup allap 20.000 dollarsinik neqeroorfigisimagaani. Imaaginnarpoq kinguaariit tamarmiusut nunap immikkoortuani maaniittut taasinissai tamarmiusut pisiariumaneqarmata, matumanilu taasinernik pipallaassineq taasinernillu pisiniarneq tassaanngitsut Afghanistanimiunit tupaallaatigineqartartut. Tamatumuunakkulli taakkua tupaallatissinneqassagunarput. Taamatut Philip Cocard Khabulimiit oqaluttuarpoq.
