Afghanistanimi qinerseqqittoqassagunarpoq
Karzai 50 procentinit qinerneqarsimanngippat Afghanistanimi qinerseqqittoqartariaqassaaq. Nunap tunngaviusumik inatsisaa naapertorlugu taamaaliortoqartariaqassaaq.
Maannamut inerneriugallartut takutikkaluarpaat Karzai aggustip 20-ani qinersinermi 54,6 procentinit qinerneqarsimasoq, qinersinermik nakkutilliisoq amerikaminngaanneersoq ullumi oqarpoq Karzai 48 procentinit qinerneqarsimasoq.
Taamaassimassappat nutaamik qinersisoqartariaqassaaq, qinerseqqittoqassanersorlu qinersinermik aqutsisut aalajangertussaavaat.
Qinersinermi peqquserluttuliortoqarsimasoq, qinersinermik alaatsinaattut oqaatigaat. Qinersiviit katillutik 7000-iupput, qinersiviillu peqquserluttuliorfigineqarsimasut 210-unerarneqarlutik.