Afghanistanimi qallunaat marluk toqutaapput

Afghanistanimi Estlandimiut Tuluillu sakkutuui ilagalugit qallunaat illoqarfiup Gereshk-ip eqqaani qooroq, talebanit qimarnguiat sapaatip akunnera kingulleq saassutaraat, ippassarlu akersuuttoqarmat qallunaat marluk toqutaapput.

Hellmanimi qooqqumi naggoreqisumi talebanit sapaatip akunnera kingulleq tikillugu qimarngusimasut qimaatinneqarsimagaluartut, ippassaq uteqqimmata akersuuttoqarnerani qallunaat marluk toqutaapput. Sapaatip akunnera kingulleq qooqqumi tassani qallunaat allat marluk ikiligaapput.Sakkutuut qullersaqarfiata internetikkut nittartagaani ippassaani allaaserineqaraluarpoq talebanit qimaatinneqarsimasut, qooqqumilu sakkussaliorfiit tiguarneqarsimasut. Kisiannili talebanit ippassaq tassa uteqqissimagaluarput akeruusuutereerlutilli qimaateqqinneqarsimapput. Akersuunnermi qallunaat marluk toqutaapput, ataaserlu ikiligaalluni, generalmajor Peter Kjærskov taama nalunaarpoq.

Danmarkimi sumiiffinni marlunni, Høveltemi Rosenborg Ekseserpladsimilu ullumi toqusut eqqaaniarneqarput.

Sakkutooqarfimmi sakkutuut sanileriiaarsimapput kamippaat qillarissuinnaat, ippassarlu Afghanistanimi akersuuttoqarnerani sakkut assingi tigummiarpaat erfalasorlu qiteqqusimalluni. Major Ole Lauersen oqalugiarnermini oqarpoq neriukkaluarluni kingullermik eqqaaniaalluni, kisiannili ajoraluartumik taamaannavianngitsoq. Kingorna apersorneqarluni oqarportaaq, arlaleriarluni eqqaaniaasarsimagaluarluni kisianni sungiunneqarsinnaanngitsoq. Suli nalunarallarpoq qaqugu toqutaasut angerlaanneqarsinnaassanersut, sakkutuulli qullersaqarfiata toqutaasut ilaqutai ilagalugit tamanna piareersarpaat.