Afghanistanimi opium "anitsaaliorneqalerpoq"

Afghanistanimi ikiaroornartumik opiumimik naatitsisarnerit akiorniarlugit Naalagaaffiit Peqatigiit allatut iliorlutik suliniuteqarnialerput. Ikiaroornartumik akiuiniarnermi nunap killeqarfiisa nakkutigineqarnerulernerannik, taamaasillunilu ikiaroorniutit annissassaagaluit Afghanistanimiitiinnarnerini tuniniaanermi aki appartinniarneqalerpoq.
maajip 27-at 2009 09:22

Naalagaaffik eqqisiviilliorfiusoq Afghanistan ikiaroornartumik opiumimik "tupitsittariaqalersoq" Naalagaaffiit Peqatigiinni isumaqatigiissutigineqarpoq. Ikiaroornartumik annissuinermut akiuiniaqatigiit pisortaata Antonio Maria Costap siunniusimavaa ikiaroorniut opium Afghanistanimi ima annertutigilissasoq allaat naalagaaffik Afhganistan ikiaroorniummik opiumimik "tupitsinneqassalluni". Ikiaroorniutip opiumip akia sapinngisamik appasitsinniarneqassaaq, naatitsisartut paasiniassammassuk naatitsineq imminut akilersinnaanngitsoq.

Nunarsuaq tamakkerlugu ikiaroorniummik opiumimik naatitsinerup 75 procentia Afghanistanimi naatinneqartarpoq. Naalagaaffiulli piitsooqisup Afghanistanip killeqarfii opiumimik annissuiffiit ima nakkutigilluartigineqarsinnaanerpat, annissuinerni iluanaarutit pikitsitsisunit Talibaninit iluanaarutaajunnaarsinneqarsinnaanngorlugu?

Danmarkimi illersornissami ilisimatusarfimmi atorfeqartup Peter Dahl Truelsenip Afghanistanip killeqarfiinik nakkutilliiniarnerup iluatsinnissaa qularutigaa:

- Takorlooruminaatsippara. Naalagaaffik Afghanistan saniliminut Iranimut 1.000 kilometerinik, Pakistanimut 2.500 kilometerinik, avannaanilu naalagaaffinnut allanut, soorlu Ruslandimut killeqarfeqarnera umerualaaraanni takuneqarsinnaavoq ikiaroornartumik annissuiniat tamakkiisumik nakkutigineqarsinnaannginnerat.

Peter Dahl Troelsen isumaqarpoq ikiaroorniummik opiumimik naatitat sorlaat ilanngullugit nutsunneqanngippata, naatitanillu allanik naatitsivigiortorneqanngippata pilersaarut iluatsinnavianngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq