Afghanistanimi kaannersuaqalernissaa aarleqqutigineqarpoq
Sivisuumik siallernikuunngimmat akersuuttoqartuarneralu pissutigalugit, Afghanistanimi inuit 9 milliuunit ukiuunerani nerisassaaleqilernissaat ilimagineqarpoq. Ukiorpassuit ingerlanerini aatsaat taama naasorissaasut pissarsinikitsigigamik, aningaasat upernaap aasallu ingerlanerani atorniarsimasatik taarsipallanniarlugit, naasorissaasut opiummimik naatitsiniaqqittalernissaat aamma annilaanngatigineqarpoq. Afghanistan nunarsuatsinni naalagaaffiit piitsuunerit ilagimmassuk ikiuiniaqatigiit nunanik allanik ikiuiniaqataaqqusillutik kaammattuipput. Isumannaallisaanerullu naammaginanngilluinnarnera peqqutigalugu naalagaffiup ataatsimut isigalugu iluarsaattuuteqqinnissaanut siunniussat anguneqarsinnaanngillat. Nunanit allanit ikiuissutaasussatut neriorsuutigineqarsimasut 70 milliardi koruunit 40-procentii naalagaffinni tunisiniartuni siunnersuisunut atorneqarsimapput, Afghanistanimilu peqquserlullutik iluanaapilunniarnerat aamma aningaasarpassuarnik naleqarmat ikiortariaqavissut siornatigut neriorsuutigineqartunut utaqqilussinnaramik tatiginnikkunaarluinnarput. Kaattut siunissamullu neriuutaarulluinnartut akornanni, minnerunngitsumik inuusuttut akornanni Talebanit tapersersuisussarsiornertik ajornannginaarsinnaammassuk aamma ernummatigineqarpoq. Pissutsilluunniit qanoq ikkaluarpata ukiuunerani inuppassuit ikiorserneqarnissaat tuaviornarsilersoq, ikiuiniaqatigiit nalunaarput.
