Afghanistan suli najummassimanarnerulerpoq
Afghanistanimi sumiikkaluaraanniluunniit, tassa matumani Kabulip naalakkersuisoqarfianniikkaluaraanniluunniit kikkulluunniit eqqorneqarsinnaasut Talebanikkut takutikkumavaat.
Naalakkersuisut illorsui annertuumik isumannaallisangaagaluarput, taamaattorli eqqorneqarlutik.
Tassa ullumi qaartartumeerineq annilaangasaarineruvoq, kikkullu pissaaneqavinnersut inuinnarnut takutinniarneqarluni.
Ullaap tungaani saassissisoqarmat inuinnaat sakkutuullu tallimat toqutaapput, inuillu allat 40-t ikiligaasimallutik. Peqqarniisaarniat isumannaallisaanissamullu sakkutuut nalunaaquttap akunnerini pingasuni akersuutereermata peqqarniisaarniat arfineq-marluk toqunneqarput. Akersuunnerullumi sivitsortuusileraluarnerata isumannaallisaanissamut sakkutuuliussat peqqarniisaarnianit ajornartorsiortinneqarsinnaaneri peqqarniisarnianit takutinneqarpoq.
Ullaarlu qaartartumeerineq akisussaaffiginerarlugu Talebanikkut tulluusimaaqalutik nalunaarutigikatareerpaat.
Asulu Afghanistanip præsidentiata Hamid Karzai-p naalakkersuisuutinneqartut soraarsereerai pissaaneralu annikilleruttortoq, Londonimilu ullut qulit qaangiuppata nunat tamat Afghanistanimi Talebanit qanoq iliuuseqarfigineqarsinnaanersut ataatsimeersuassutigineqartussanngortorlu saassussineq pisimavoq.
