Afghanistan: Qinersisoqalerpat saassussisoqariaannaavoq
Afghanistanimi naalakkersuisut NATO-llumi taamaattoqannginnera oqaatigiuaraluarpaat.
Taamaannerali maanna isertuunneqarsinnaajunnaarpoq, paasissutissammi Afghanistanimi sakkutuut suliarisimavaat nunallu immikkoortuini 356-ini qanoq saassusseriaannaasoqartiginera misissorsimallugu. Nalunaarusiap assinga tuluit nutaarsiassaqartitsiviata pissarsiarisimavaa.
Nunap immikkoortuini 133-ni saassusseriaannaasoqarpoq allallu 13-it pikitsitsisunit aqunneqalereerlutik. Saassussisoqarsinnaanera pillugu nalunaarusiaq qaammatit marlussuit matuma siorna, tassa aprilimi, suliarineqarpoq taamanikkullu NATOp sakkutuui Helmandip immikkoortuani saassusserujussuartalerput.
Afghanistanip kujasinnerusortaa Talebaninit sakkulersortunillu allanit saassunneqarataannaasoq allaaserineqarpoq nunallu assinganik sumi saassussisoqarsinnaanera titartarneqarimalluni.
Pikitsitsiniat islamisiortut qanoq pisinnaanertik ippassaq takutereerpaat, pingaarnertummi illoqarfia, Kabul, rakettinik qulingiluanik eqqorpaat, ukiorpanngortunilu maanna taamaattoqarsimanngikkaluarpoq. Talebanimiulli nunap kippasinnerusortaani avannarpasinnerusortaanilu saassussisarnitik aamma annertusiartortikkaat nalunaarusiami eqqaaneqarpoq.
Ukiut arfineq-pingasut matuma siorna Amerikamiut Afghanistanimut sakkutuuliinerisa kingorna 2009 maannamut aagasannerpaavoq, Talebanillu qinersiartunngitsoortoqarnissaa kajumissaarutigalugu qineqqusaarnerup nalaani saassussisarniarlutik sioorasaaripput.
Natop generalsekretæreriligaa, Anders Fogh Rasmussen, suliffittaamini suliaminut siullersaatillugu ullumi Afghanistanimut tikippoq. Afghanistanimi sorsunneq Fogh Rasmussenip pingaartilluinnaraa tikeraarneratigut paasineqassaaq.
