Sumi tamaani taasiffissanik tuniniaasoqarpoq qinigassanngortittullu siunnersortaat qinigassanngortitartik amerlanerusunik taaneqaqqullugu qinersisitsisunut aningaasanik neqeroortarlutik.
Taamaattumik Afghanistanimiut aqaguagu præsidentissarsiorluni qinersinissaanni taasivinni peqquserluttoqartarnissaa qularutissaanngilaq. Tamanna BBC-mit eqqoriarneqarpoq akilersilluni peqquserluttuliortoqarneranik tusatsiakkat misissorniarlugit tusagassiortunik Afghanistanimukartitsisussamit.
Inuit ilaat qinersinissamut uppernarsaatinik 1000-inik piseqqullugu neqeroorfigineqarsimavoq. Taasivimmut isernissamut billetti 50 kr.-it missaanni akeqarpoq. Tuniniaasut arlallit tuluit tusagassiortuinut taamaangajattunik neqerooruteqarsimapput.
Taamaaliorluni taasisinnaanermut saniatigut periarfissanik qasserpiaat pisisimanersut nalunaqaaq, taama oqaluttuarpoq BBC-mi tusagassiortoq. Kisiannili qularnanngilaq qinersinissamut uppernarsaatinik tuniniaasut arlallit tigusarineqarsimasut.
Nunap avannarpasinnerusortaani naggueqatigiinnut siulersorti sunniuteqarluartoq BBC-mit aallartitanut oqaluttuarpoq qineqqusaartumut aalajangersimasumut qinersivippassuarnik qaleriissanik 1000 kr.-inik arlalinnik akiliilluni qanoq neqeroorfigitissimanerluni.
Afghanistanimili tusarfiit killiit taamaattoq peqquserlunnikkut akiliisitsilluni qinersinissap maannakkorpiaq qinersinngitsoornermit pitsaanerusoq BBC-mut erseqqissarpaat.