Afganistan pillugu Tuluit ernumasut amerikamiut eqqissisaapput

Tuluit Nunaata nunanut allanut naalakkersuisua David Miliband oqarpoq, Afghanistanimi præsidentimut qinersineq kiffaanngissuseqartumik naapertuilluartumillu ingerlanneqarsimasutut taaneqarsinnaanngitsoq, qinersinermut atatillugu peqquserluttoqarneranik isornartorsiuinerit taama amerlatigimmata. Oqarporlu Tuluit Nunaat qinersinerup pinerlunnikkut malunnarunnaarsarneranut peqataanianngitsoq.

Taasiartorfinni arlalissuarni qinersinermi peqquserluttoqarsimaneranik ersersoqarnerata kingorna Naalagaaffiit Peqatigiit qinersinermut nakkutilliisoqarfiata qinersineq atortussaajunnaarsimmagu ilaatigut Miliband-ip ernumanera aallaaveqarpoq.

USA-lli sumiiffimmut immikkut aallartitaa, Richard Holbrooke, isumaqarpoq qinersinermut isornartorsiuisut silatusaartariaqartut.

Sorsuuttoqarnerata nalaani pissutsit ilungersunartorujussuit atuunneranni præsidentimut qinersineq ingerlanneqarpoq, taamaammat qinersinerup inernera qanoq issanersoq takoqqaarniartigu.

Nunani killerni qinersinerit aamma pitsaalluinnanngitsut ingerlanneqartarput aamma Afghanistani pissutsit taama inneranni qinersisitsimmaammalluunniit sapiitsuliorneruvoq, USA-p aallartitaa oqarpoq. Taamaammat tuaviortumik inerniliinnginnitsinni qanoq pisoqassanersoq takulaaqqaartigu, Richard Holbrooke oqarpoq.

Taasinerit kisinneqarneranni inernerugallartut malillugit maanna præsidentiusoq Hamid Karzai, taasisut 54 %-iisa missaannik taaguunneqarsimavoq.

Taamaalilluni tamatuma kingunerisinnaavaa qinersinerup aappaanik ingerlatsinissap pinngitsoortinneqarnera, taamaakkaluartoq qinersineq pillugu misissuineq qaammatit arlallit qaanngiuppata aatsaat naammassineqarsinnaavoq.