Affaat suliffeqarlutik aningaasarsiorusupput
Inuiaqatigiinni misissuisitsisoq, Birger Poppel, ima oqarpoq:
- Nunaqarfimmiut 49 procentii suliffeqarlutik aningaasarsiorusupput. Illoqarfimmiullu sisamararterutaasa piniarnermik, savaateqarnermik tuttuuteqarnermillu inuussutissarsiuteqarusunnertik pilerigineruaat.
Nunaqarfinni inuunerup pingaarnertut aalisarnermik aallussinerusup ilungersunarsinnaasarnera aalajangersimasumik akissarsiaqarluni sulerusussuseqarnermut pissutaasinnaavoq.
Illuanilli nunatsinni illoqarfimmiorpaaluit, tassa 27 procentit, aalisarnermik savaateqarnermilluunniit inuussutissarsiuteqarusunneri nunaqarfimmit illoqarfimmut nuuttariaqarsimanermik aallaaveqarsinnaapput. Nunaqarfimmi kiffaanngissuseqarluni nammineq inuuniutigisinnaasaraluaq eqqarsaatigineqarsimasinnaammat, Ilimmarfimmi inuiaqatigiinnik ilisimatusartoq Birger Poppel oqarpoq.
Inuit 1.200-it apersorneqartut arlaannaataluunniit periarfissat tamaasa, tassa aalisartuuneq sulisartuunerlu, inuussutissarsiutissamittut toqqarsimmanngilaat.