ADHD-mik innarluutilik 13-ertoq
Ilulissani Autismemik ADHD-millu innarluutillit nalinginnaasut atuartut avataanni immikkut inissillugit atuartinneqartarnerat misilittagaqarfigineqarpoq.
Taamaaliortarnerlu iluaqutaalluartoq uppernarsaatissaqalerpoq, ilinniartitsisup angajoqqaat, atuartullu akunnerminni isumaqatigeeriarlutik atuartoq ADHD-eertoq tuluttut pikkorissoq soraarummeeqataasussatut inissikkamikku, 13-nermat oqaluttuarisaanermullu ilanngulluni:
- Atuarfitsialaap atuutilernerata kingorna ADHD-mik innarluutillit akornganni siullersaalluni fagimi pikkoriffigisamini soraarummeerpoq, taamaammat ajuusaarutigaarput politikerit taamatut immikkut atuartitsisarnerit ilanngartuiffigimmatigit, Michael Jensen oqarpoq.
Politikerimmi aaliangiinikuupput annertusisamik immikkut atuartitsinerit ikilisaaffigineqassasut, taamatut inissisimasut atuartut nalinginnaasut akornanni atuarsinnaalluartutut naliliillutik.
Heldagsskolep nukappiaraannarnik atuartoqartup pisortaata klassemi nalinginnarmi ADHD-tumik atuartitaqarluni misilereerpaa
- 2003-mi atuartut 20-it akornganni ataatsimik ADHD-tumik atuartitaqarnikuuvunga, taassuma innarluutillip atuartitsinerup 80 imaluunniit 85 procentia iisarpaa, sinnerilu eqqugaallutik Michael Jensen oqarpoq.
Michael Jensen taamaammat isumaqarpoq Ilulissanitulli ADHD-mik Autismemillu innarluutillit immikkut atuartinneqartariaqartut, atuartitammi ilaata 13-nersinnaanerata tamanna uppernarsereerpaa:
- Heldagsskolemi sulisut pitsaalluinnartumik suliaqartut takutippaa tamannalu tanngassimaarutigaarput, Michael Jensen oqarpoq.
Avannaani atuarfiit pisortaasa naatsorsuinerat malillugu sapaatip akunneranut akunnerit 40-t ukiarumiit ilanngarterneqassapput. Ilinniartitsisut kattuffiat IMAK massakkorpiaq immersugassanik atuarfinnut tamanut nassiussuilerpoq paasiniarniarlugu nuna tamakkerlugu sipaarutit qanoq eqquitigissanersut.
