ACR-imi 132-it takinermut sisoqqallutik aallartuupput
Ujakkaarluni sukkaniunnersuit nunarsuarmi sakkortunersaat Arctic Circle Race, ACR, Sisimiuni ingerlanneqartartoq aallartiinnaqaaq.
ACR pisarneq malillugu ulluni pingasuni ingerlanneqartaraluaq ulluni marluinnarni ingerlanneqassaaq, taamaammallu ingerlaarfiit isorartussusaat allanngorput takininngorlugit.
Silapiluup aallartinnissaraluaq ippassaq ajoqusereeraalu Sisimiuni silagissuugaa arpattussat 132-t 63 kilometerimut ujakkaassallutik ullaaq qulinut aallakaapput.
Arnani siulliullutik apuuttut pingasut Kalaallit Nunaanneersuinnaapput, angutini nunani allaneersuusut.
Angutini Thomas Freimuth Tysklandimeersoq apuuteqqaartuuvoq 63 kilometerimut atorsimallugit 4 timer 19 minutsillu. 2-uvoq Øystein Slettemark, Kalaallit Nunaanni najugaqalersimasoq 3-uvorlu siorna ajugaasoq Jonas Thor Olsen, Danmarkimeersoq.
Arnani Niviaq Chemnitz Berthelsen apuuteqqaartuuvoq, 63 kilometerimut atorsimallugit 5 tiimit 49 minutsillu, 2-juvoq Uiloq Slettemark 3-ullunilu Dia Hansen.
- Sila atoruminaqaaq, 20-nik issippoq, avannerluni, taamaammat issinnerususut ippoq, ACR-imi siulittaasoq Jens Klaus Lennert inuilaarsuarmi unnuiffissamiit nalunaarpoq.
-Peqataasulli ajunngeqaat, nuannaaqaat. Ataaseq uniinnarpoq aamma pingasuunngikkunik sisamat Sisimiunut uunnasseriartortariaqarsimallutik. Kisianni ajunngillat, aqagu ullaakkut qulingiluanut aallassapput, sisoraatinik oqilaniunnermi 57 kilometerit kingulliit Sisimiut tungaanut ingerlaarfigissallugit, siulittaasoq oqaluttuarpoq.
Naannernut sukkaniunneq Miki ACR aamma ullumi ingerlanneqarpoq, nalunaaqutaq ataatsimut meeqqaniit utoqqarnut 1, 2, 4 aamma 10 kilometerimut unammisussat aallakaammata.
Arctic Circle Racemi peqataasut nunanit 15-ineersuupput, aqagulu sukkaniunnerit ulluisa kingullianni Sisimiormiorpassuit peqataasullu ilaqutaat sumiiffinnit tamalaaneersut tikilluaqqusiortuunnissaat qularnanngilaq.
