ABCT nersornaasigassatut innersuunneqarpoq

Nunat Avannarliit Killiit meeqqanut inuusuttunullu atuakkianut nersornaasiuttagaa ullumi saqqummiunneqarpoq, Julie Edel Hardenbergillu atuakkiaa ABCT Kalaallit Nunaanni naliliisartunit innersuunneqarpoq.

Naliliisartut ilaatigut oqarput atuagaq tamatigoortuusoq, aamma kalaallisut allataanini immikkuullarissutigigaa. Atuaraanni oqaatsinik pinguarusunneq pinngortarpoq. Atuagaq qalipaatigissaartuuvoq, takuneqarsinnaavorlu atuakkiortoq atuakkallu assiliartassaanik titartaasut suleqatigiilluarsimasut. Kalaallisut taalliat isumaqarpianngitsut, kisianni quianartut, taavalu naqinnernik naggateqatigiiaarineq.

ABCT-mi ilaatigut assiliartalersuisuupput Bolatta aamma Inuk Silis Høegh, Christian Rex, Niels Motzfeldt, Nuka Godtfredsen taavalu atuakkiortoq nammineq, tassa Julie Edel Hardenberg.

Taama nersornaasiisarneq ukioq allortarlugu pisarpoq, sisamassaalu ukioq manna nersornaasiisoqassaaq. Savalimmiuniit, Kalaallit Nunatsinniit Islandimiillu juullip qaammataani naliliisoqartarpoq, kikkut nersornaaserneqassanersut. Nunani Avannarlerni Killerni naliliisartut atuakkiortoq sorleq nersornaaserneqassanersoq aalajangertarpaat, nersornaallu aappaagu 2008-mi aggustip qaammataani tunniunneqartussaassaaq.

Nersornaat 60.000 koruuninik aningaasartaqartarpoq.