Nunatsinni aarrip immap naqqani nerisassarsiortup assilineqanera pinngortitami assilisat pitsaanersaatut ukioq manna toqqarneqarpoq.
Assilisat unammissutigineqarneranni assit 18.000-t akornanni ajugaasutut asseq taanna toqqarneqarpoq. Unammineq Shell Wildlife Photographer of the Year-imik taaneqartarpoq. TV 2 nittartakkamini taama allaaserinnippoq.
Londonimi pinngortitaq pillugu katersugaasivik BBC-illu uumasunik nujuartanik nutaarsiassaqartitsivia suleqatigiillutik unammisitsipput.
Goran Ehlme, ukiorpassuarni pinngortitami assiliinermik misilittagaqartoq, assiliisuuvoq. Taassuma assilisami ilaat BBC-imut tunisarsimavai.
- Aaveq immap naqqani tamuluttoq assilereerlugu assiliivinnit piingajavikkaluarpara, Goran Ehlme BBC onlinemut oqarpoq.