Aavareersut tuttup neqaanik tuniniaaleruttorput
Tallimanngormat aggustip aallaqqaataani tuttut kingumut piniagaaqqilerput.
Aavareersimasullu ilaat maanna illoqarfimminnut utereermata, kalaaliaraq tuttut neqaateqaqisoq alakkarparput.
aggustip 03-at 2008 13:22
Aavaqqammersimasoq Andreas Martinsen piffissaq aavarfiup aallartiffia ima isummersuutigaa.
- Isumaqarpunga aavarfiup aallartiffiata ullua tulluartoq, Andreas Martinsen oqarpoq.
Taanna isumaqarnerarportaaq siornatigumut sanilliullugu tuttut tikiussukkatik taamaapajaaginnartut aammalu pisariniarnerat ajornakusoornerunngitsoq.
- Tuttut tiffasikkunaarput sissamullu qaninnerulerlutik immaqa nunap tiffasissortaa panernerulersimammat isugutannersiortartut, piniartoq Andreas Martinsen oqarpoq.
Kalaaliaqqami tuttup neqisiniartut ilaat Rene Olsen naapipparput.
- Tuttup neqaanik pisiniarpunga ippassaq tuttup neqaanik grillerigatta mamarpallaaqimmat ullumi aamma tuttup neqaanik grillereqqinniassagatta, Rene Olsen tuttup neqitussamaaqisoq oqarpoq.
