Aavaat tusarnaartitsinerannut tusarnaariartorpassuit
Erinarsoqatigiit Naalagaaffeqatigiinni domkirkeni tamani tusarnaartitsiniarlutik anguniagaqarput. Tamannalu ajornaatsuinnaanngitsoq, Carsten Siegstad Avaakkunneersoq oqaluttuarpoq.
- Aavaat Ribe Domkirkemi tusarnaartitsiniarlutik saaffiginninnerminnit ukioq ilivitsoq utaqqisariaqarsimapput.
Domkirkelu naapertorlugu ulloq eqqaamaneqartuarumaarpoq, oqaluffimmi tusarnaarianik tattoqissimavoq. Erinarsoqatigiit tussiutinik, pinngortitalersaarutinik unikkaanillu tusarnaartitsipput.
Aavaat siornatigut domkirkemi erinarsoreersimapput, tamannali naalagiartitsinermut atatillugu pisarsimalluni, soorlu assersuutigalugu silap pissusii pillugit Københavnimi ataatsimeersuarnermut atatillugu Ataqqinartorsuup Dronningip Afrikamilu Kujallermi Ærkebiskopiusimasup Desmond Tutup peqataaffigisaannik naalagiaqatigiittoqarmat. Aammattaaq kalaallit Roskilde Domkirkemi naalagiaqatigiinnerini tussiartuusarsimapput. Erinarsoqatigiilli domkirkemi tusarnaartitsivinnerat siulleq Sverigemi Lundip Domkirkeani apriilimi 2013-imi pivoq.
