Aavaat siulersortaat utertussanngorpoq

Erinarsoqatigiit Aavaat ukiuni arlaqalersuni siulersortaat, Mads Lumholt, maanna siulersortaaqqilissaaq, taanna ukiumi ataatsimi siulersortitut sulinngiffeqareerluni utertussanngorpoq.
Allattoq Apollo Jeremiassen
juulip 18-at 2011 09:38

Aavaat siulersuisuini siulittaasoq, Carsten Siegstad, taama nalunaarpoq.

- Maasip uternissaa nuannaarutigeqaarput. Maannakkorpiaq pisariaqartipparput ukiuni tulliuttuni ataavartumik siulersuisoqarnissarput, Carsten Siegstad oqarpoq.

Erinarsoqatigiit Aavaat Tivolimi sapaatiuppat juulip 24-ani tusarnaartitsisussaapput.

Mads Lumholt ukiumi ataatsimi "sulinngiffeqarnermini" KNR-imi erinarsortartut Qupannavaat pilersinneqarneranni siuttuuvoq. Nuummiikkaangamili Qupannavaanut peqataasarumaarluni pilersaarusiortarumaarlunilu unnerpoq.

Erinarsortartoq sverigemeersoq Sofi Ek Haxholdt maanna Qupannavaani siulersortaavoq.

Mads Lumholtip ilisimaneqaataanut ilaavoq, All Starsimi, TV2-mi aallakaatinneqartumi, erinarsoqataasimanini, nipilersortartutullu aamma tusaamaneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq