Aavaakkut Dronningi erinarsorfigissavaat

Qallunaat, kalaallit savalimmiormiullu erinarsortartut 1.000-it erinarsoqatigissavaat.

Tamanna Aavaakkunnut misigisaassaaq nuannersoq, Aavaakkunni siulittaasoq Carsten Siegstad oqarpoq.

- Erinarsoqatigiinneq nuannersuuvoq inuit amerlasuut ataatsimoorlutik nuannersumik saqqummiussisarmata, oqarpoq.

Erinarsoqatigiissuit Frans Rasmussenimit siulersorneqassapput ilaatigut erinarsussallugu "I Danmark er jeg født".

Ataatsimut erinarsoqatigiinnerup saniatigut Aavaakkut kalaallisut tussiummik atuissapput nalliuttorsiorluni Christiansborg Slotskirke-mi naalagiaqatigiittoqalerpat.

Aavaakkut Dronning siornatigut erinarsorfigereerpaat. Erinarsoqatigiit Erik aappalaartup nunatsinnut tikinneranit ukiut 1.000-nngortorsiorneqarmata kujataani 1999-mi erinarsoqataapput. Kingullermillu Dronningip peqataaffigisaani erinarsorput Jonathan Motzfeldt eqqaaniarlugu København-imi naalagiaqatigiinnermi.