Aatsitsiviliornissamut paasissutissiisoqarnerunissaa ujartorneqarpoq
Hans Kleist: Isumaqaraluarama inissaqarnermut tunngasut Alcoap akissaajaatigiumaarai, kisianni naamik, kommuninngooq namminersortullu akissaajaatigissavaat. Tassa illoqarfik nutaaq pilersinneqassaaq minnerpaamik - immaqa meerartai ilanngukkaanni - 3000-it sinnerlugit angissusilik. Tamakkua initaartortinnissaat kiap isumagissavaa, Alcoanngooq isumagissanngilaa, ataatsimiititsinermi taamatut oqaatigineqarpoq.
Ove Rosing Olsen: Aningaasarsiornikkut ineriartorneq unittoorluinnangajassimavoq, annikitsuarannguit kisimik ingerlapput taavalu inuit kipiluttortutut massakkut inissisimalerput. Tassanngaanniit alloriaqqittariaqarpugut, aningaarsarsiornikkut periarfissanik nutaanik annertuunillu tigusisariaqarpugut neriuuteqaqqittariaqaleratta, taavalu aamma ineriartortutut inuiaqatigiittut anersaaqarluta inuusariaqaratta.