Aatsitassarsiulernissaq aningaaseriviup neriuutigaa

Aningaasanik niuerfippassuit amigartoorfiuleruttornerisa nalaanni aningaaserivik Grønlandsbanken ajugaasimaartutut misigisinnaatitaalluarpasippoq. Aningaaserivimmi akileraarutit suli ilanngaatiginagit 135 millionit koruuninik sinneqartooruteqarmat, ukioq 2012 aatsaat taama sinneqartoorfiutigaluni anigorneqartussanngorpoq. Ukioq 2011-mi sinneqartoorutit isaasalerlugu 78 millionit koruuniinnaasimapput.
Allattoq Jonas Løvschall-Wedel, Knud Reimer
februaarip 20-at 2013 06:42

- Illoqarfinni anginerni, tassa Nuummi, Sisimiuni, Ilulissani Aasiannilu inuinnarnut aningaasanik taarsigassarsititsinerulersimavugut, Martin Kviesgaard, aningaaseriviup pisortaa oqarpoq.
Aningaaseriviup sinneqartooruteqarluarnera aningaaserivimmik piginneqataassuteqartunut tusarluarnassaqaaq, taakkumi sinneqartoorutineersut 99 millionit koruunit agguaatissammatigik.
Aningaaserivilli angusarissaaraluaqisoq nunarsuarmi aningaaseriviit navianartorsiorrannerisa kingunerisaanik ukiumi matumani qanoq pisoqarnissaa nalunaqisoq, aningaaserivimmi pisortaq oqarpoq.
- Maani aningaaserivitsinni ajunngivissumik patajaatsumillu ineriartortitsivugut. Nunarsuulli sinnerani suna tamarmi ammuinnaq ingerlavoq, maanilu nunatsinni aatsitassarsiorneq piaarnerpaamik aallarnersarneqanngippat uagut ammuinnaq aamma aallarnissarput ernummatigaarput, Martin Kviesgaard oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq