Aatsitassarsiortut suleqataat peqquserluppoq
Nuuk TV- mi saqqummiunneqartut naapertorlugit, Isukasiani sulinermi aningaasartuutissat SNC Lavelin-ip naatsorsorsimavai, taakkununnga ilanngullugit, akileraarutinit isertitassat misissorneqarnerat sulianilu angisuuni ingeniørit suliassaat aamma misissorneqarlutik.
SNC Lavalin-imi pisortaanerusimasoq Pierre Duhaime pisortaanertut ukiormanna tunuartoq, angerlarsimaffimmini Canada-mi politiinit pingasunngormat tigusarineqarpoq.
Taanna aningaasanik millionit dollars-it arlallit nalinginik ileqqorlulluni iluanaarniarsimasutut peqquserlussimasutullu pasineqarpoq.
Suliffeqarfiup allaffeqarfiata pingaarnersaani, nalilinnik tammartoqarsimanera pillugu politiit ukiormanna misissuipput, unnerluussisup oqaatigaa peqquserluttuliortoqarsimasoq, taamanikkullu pisortaanerup tunuarneranik kinguneqartoq.
Suliffeqarfimmi SNC Lavalin-imi atorfillit qaffasissut ilaat Schweiz-imi parnaarussaaqqavoq, taanna aamma peqquserluttoqarsimaneranut atatillugu unnerluutigineqarpoq.
London Mining-ip Kalaallit Nunaanni paasissutissiisartua Kaj Kleist Nuuk TV-imi apersorneqarluni oqarpoq, SNC Lavalin-ip politiinut suliassanngortinneqarnera, London Mining-imik suleqateqarneranut sunniuteqarnavianngitsoq.
