Nunatsinni aatsitassarsiornerit uuliaqarneranillu misissuinerit amerliartorput, suliffeqarfissuillu Canadameersut Tuluillu Nunaanneersut nunatsinni aatsitassarsiornissaminnik soqutiginninnerpaajupput.
Aatsitassanut pisortaqarfiup allattorsimaffiani tamanna takuneqarsinnaavoq.
Aatsitassarsiornissamik uuliasiornissamillu misissueqqissaarnissamut qinnuteqaatit maanna suliarineqartut arfineq-pingasuupput.
Aatsitassarsiornissamik akuersissutit tunniunneqarsimasut maannamut 37-upput, taakkunanngalu nunatsinneersoq NunaMinerals arfineq-pingasunik akuersissuteqarluni amerlanerpaanik akuersissuteqarpoq.
Canadamiut suliffeqarfissuisa nunatsinni aatsitassarsiorusunnerat malunnarpoq, akuersissutinimi 37-t akornanni, 13-it canadamiunut tunniunneqarsimapput.
Tuluit nunatsinnut aamma soqutiginnittorujussuupput, suliffeqarfiimmi Tuluit Nunaanneersut katillugit qulinik akuersissuteqarmata.
Ukiut qulit matuma siornatigut nuna misissuiffigineqartoq 60.000 kvadratkilometeritut annertutigisimagaluartoq, ukioq manna sisamararterutaannanngorluni 15.000 kvadratkilometeriinnanngorsimavoq.
- Imaanngilaq soqutiginnittut ikiliartorsimasut, suliffeqarfiilli qinnuteqaateqaraangamik nuna misissuiffigerusutartik sapinngisamik annertuallaartikkusunneq ajorpaat, Ole Fjordgaard Kjær, aatsitassanut pisortaqarfimmeersoq oqarpoq.