Aatsitassarsiornermut tunngatillugu innuttaasunik peqataatitsinissaq oqallisigileraat

ICC aamma WWF-ip KNR suleqatigalugu Nunatsinni aatsitassarsiornermut tunngatillugu innuttaasunik peqataatitsineq pillugu piviusulersaarummik suliaqarsimapput, taannalu Kalaallit Illuutaanni ualeru oqallitsitsinermi takutinneqassaaq.

Piviusulersaarut takutinneqareerpat Nunatsinni innuttaasunik peqataatitsinerup qanoq iliornikkut pitsaanerulersinneqarsinnaanera oqallisigineqassaaq.

AAMMA ATUARUK Innuttaasut peqataatinneqarnerat KNR-imi sammineqassaaq

Innuttaasut tusaaniarneqartassapput

- Aatsitassarsiornermut tunngatillugu innuttaasunik peqataatitsineq Kalaallit Nunaanni ukiuni kingullerni oqallisaasupilussuuvoq. Aatsitassarsiornerup aallartisarneqarnerani aammalu uuliamik gassimillu ujaasisoqarneranut atatillugu Kalaallit Nunaata siunissaata ilusilersorniarneqarnerani innuttaasut peqataatinneqartariaqarput tusaaniarneqarlutillu, Nunarsuaq tamakkerlugu pinngortitaq pillugu suliniaqatigiiffik WWF tusagassiorfinnut nalunaaruteqarluni taama allappoq.

Kalaallit Illuutaanni oqallitsitsineq Aqagomit, ICC Greenlandimit WWF-imillu aaqqissugaavoq.