Aatsitassarsiornermi ulapaartoqartussanngorpoq
Aatsitassarsiortitseqatigiiffiup True North Gemsip piiaanissaminut pilersaarutaani aallartinissarnermi 60-inik sulisoqarnissaq aamma piiaaneq ingerlallualerpat 70-it 80-illu akornanni sulisoqarnissaq naatsorsuutigineqartoq, aatsitassarsiortitseqatigiiffik tusagassiuutinut nalunaarummini ilisimatitsivoq.
Kisitsisini taakkunani Nuummi aatsitassarsiortitseqatigiiffiup allaffiani aamma ujaqqanik erlinnartunik silineqanngitsunik immikkoortiterisussat 14-it ilaatinneqarput.
Nunatsinneersunik suliffissartitsisoqarnissaa, aatsitassarsiortitseqatigiiffiup neriorsuutigaa.
- Sulisorineqartut amerlanersaasa Kalaallit Nunaanni atorfinitsinneqarnissaat True North Gemsimut pingaaruteqarpoq, aamma ilinniartitsinikkut aatsitassarsiornermi pisinnaasanik ineriartortitsisoqassaaq, taamaalilluni tamanna inuiaqatigiinnut kalaallinut iluaqutaasinnaaniassammat, pisortaaneq Nicolas Houghton oqarpoq.
Aligunik aappaluttunik aamma ujaqqanik erlinnartunik tungujortunik piiaanissamut pilersaarut maanna ukiuni qulingiluani pisinnaasutut naatsorsuutigineqarallarpoq.
NunaMinerals Maniitsup kujataani aamma Nuup kujataani aatsitassanik qaqutigoortunik ujaasilluni qillerilluni aamma aallartilerpoq - aamma aatsitassarsiortitseqatigiiffik Nanortallip eqqaani kingusinnerusukkut kuultimik ujaasilluni qillerissaaq.
